თბილისი 10 რაიონად დაიყო და დედაქალაქში არსებული გამგეობების რაოდენობა 6-დან 10-მდე გაიზარდა. აღნიშნული გადაწყვეტილება დღეს თბილისის საკრებულოში გამართულ სხდომაზე იქნა მიღებული.
ფრაქცია "ნაციონალური მოძრაობის" წევრის კოკი იონათამიშვილის განცხადებით, აღიშნულ ცვლილებას არც ქალაქის ბიუჯეტი და არც რომელიმე სოციალური მიმართულება დაუზიანებია.
"ქალაქის მერიამ შემოიტანა წინადადება და გამგეობების რაოდენობა 6-დან 10-მდე გაიზარდა. ანუ თუ აქამდე იყო ვაკე-საბურთალო, ახლა ცალკე ვაკისა და ცალკე საბურთალოს გამოგეობები შეიქმნება. ეს გამოიწვია იმან, რომ ძალიან ბევრი გადაწყვეტილებაა მყისიერად მისაღები და ეს მხოლოდ გამგეობებს ხელეწიფებათ. მაგალითად, გლდანი-ნაძალადევის გამგეობა დაახლოებით, 350 000 თბილისელს ემსახურებოდა, რაც ბუნებრივია, ამ პროცესს აფერხებდა", - განაცხადა იონათამიშვილმა.
მისივე თქმით, აქამდე არსებულ 6 გამგეობაში 470 ადამიანი მუშაობდა, ახლა კი მათ მხოლოდ 70 თანამშრომელი დაემატება.