სრულიად რუსეთის პატრიარქმა კირილმა საქართველოს მართლმადიდებელ ეკლესიას წმინდა ალექსანდრე ნეველის ნაწილები გადმოცა. ცერემონია კრემლის უსპენსკის ტაძარში, ლიტურგიის შემდეგ შედგა, რომელიც ერთად აღასრულეს საქართველოს და რუსეთის პატრიარქებმა. პატრიარქმა კირილმა გაიხსენა, რომ 2013 წელი, წმინდანის გარდაცვალების საიუბილეო წელია. ამ წელსვე აღინიშნება პეტერბურგის ნეველის ლავრის 300 წლისთავი.
რუსეთის პატრიარქმა ისურვა, რომ საქართველოს მორწმუნეებს ჰქონდეთ შესაძლებლობა წმინდა ალექსანდრე ნეველის ნაწილებთან ლოცვისა, საქართველოსა და რუსეთისათვის და იქ მცხოვრები ხალხებისთვის და გაიხსენა, რომ თბილისშიც მოქმედებს ალექსანდრე ნეველის სახელობის ეკლესია.
თავის მხრივ, ილიამ მეორემ პატრიარქ კირილს მართლმადიდებლობის დამცველი უწოდა და მას ღვთისმშობლის ივერიის იკონი, ასევე, წმინდა ნინოს იკონი გადასცა. საქართველოს ეკლესიის მეთაურმა აღნიშნა, რომ პეტერბურგი, საიდანაც პატრიარქი კირილია, ფაშისტებისგან წმინდა ნინოს ხსენების დღეს, 27 იანვარს გათავისუფლდა.
ლიტურგიაში მონაწილეობდნენ: ანდრია პირველწოდებულის ფონდის პრეზიდენტი, ვლადიმერ იაკუნინი და ლიბანის პრეზიდენტი მიშელ სულეიმანი, რომელიც, ილია მეორესთან ერთად, მართლმადიდებელი ერების ერთობის პრემიის ლაურეატი გახდა. პრემიის გადაცემას პატრიარქი კირილი ხელმძღვანელობდა.
