მინისტრმა დავით დარახველიძემ დღეს დევნილთა სამინისტროს სათათბირო საბჭოს პირველი სხდომა გამართა. დევნილთა სამინისტროს სათათბირო საბჭო არის ორგანო,რომელიც ოპერატიულად განიხილავს მიმიდინარე საკითხებს. საბჭოს შემადგენლობაში შედიან : მინისტრის მოადგილეები; დეპარტამენტის უფროსები და ცალკეული სამმართველოს ხელმძღვანელები.
სათათბირო საბჭომ- 7 საკითხი განიხილა. მათ შორის: დევნილთა განსახლების მიმდინარეობა; დევნილებისთვის საცხოვრებელი ფართების საკუთრებაში გადაცემის პროცესის მიმდინარეობა; სამინისტროს მისაღები ცენტრისა და შენობის შიდა სარემონტო სამუშაოების შესახებ; ევროკავშირის ტექნოლოგიური დახმარების შესახებ.
ასევე განიხილეს მიმდინარე და დაგეგმილი პროექტები. 2012 წლის ნოემბრიდან განსახლებულ დევნილთა მაჩვენებელი როგორც თბილისში, ისე რეგიონებში. მიმდინარეობს (933 ბინიანი) 21 ობიექტის რეაბილიტაცია; 280 ბინიანი საცხოვრებელი უბნის მშენებლობა და სასტუმრო „ აიეტი" -ს რეაბილიტაცია ფოთში. ასევე, სხვადასხვა რეგიონში ობიექტების რეაბილიტაცია.
როგორც ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ აღნიშნა, პირველი სხდომა დღემდე იმიტომ არ ჩატარდა, რომ სამინისტრო მინისტრის მოადგილეებით არ იყო დაკომპლექტებული.
„განვიხილეთ ის ძირითადი საკითხები, რომელიც აწუხებს დევნილ მოსახლეობას. მათ შორის, განსახლების მიმდინარეობა, საცხოვრებელი ფართობის დაკანონების მიმდინარეობა, სარეაბილიტაციო ობიექტებზე მიმდინარე სამუშაოები, ახალი მშენებლობები და სხვა საკითხები. ასევე, სამინისტროს რეორგანიზაციის თემა. რეორგანიზაცია ერთ თვეში დასრულდება. პირველი სხდომა წარმატებით დასრულდა", - აღნიშნა დავით დარახველიძემ.
სათათბირო საბჭო თვეში ერთხელ იკრიბება, თუმცა აუცილებლობის შემთხვევაში, შესაძლებელია სხდომა თვეში რამდენჯერმე შეიკრიბოს.