ენერგეტიკისა და ბუნებრივი რესურსების მინისტრი კახა კალაძე ცნობილი ქართველი მსახიობის გურამ საღარაძის გარდაცვალების გამო მწუხარებას გამოთქვამს.
„მინდა ჩემი ღრმა მწუხარება გამოვთქვა ცნობილი ქართველი მსახიობის, ნიჭიერი და გამორჩეული ადამიანის - გურამ საღარაძის გარდაცვალების გამო და მივუსამძიმრო მის ოჯახს, ახლობლებსა და სრულიად საქართველოს" - წერს კახი კალაძე Facebook-ის გვერდზე.
შეგახსენებთ, რომ გუშინ 84 წლის ასაკში, ცნობილი ქართველი მსახიობი გურამ საღარაძე გარდაიცვალა. მისი მეგობრების ინფორმაციით, გურამ საღარაძე რეზო მირცხულავას დაკრძალვაზე იმყოფებოდა, სახლში მისვლისას კი დივანზე წამოწვა და გარდაიცვალა. გურამ საღარაძეს ქართული კინოს განვითარებაში შეტანილი წვლილისთვის 2006 წლის რუსთაველის თეატრის წინ ვარსკვლავი გაუხსნეს.
გურამ საღარაძე 1929 წელს დაიბადა. 1951 წელს დაამთავრა შოთა რუსთაველის სახელობის თეატრალური ინსტიტუტი და ჩაირიცხა რუსთაველის თეატრის დასში. მის მიერ შესრულებული როლებია: სოსო (ო. იოსელიანის "ადამიანი იბადება ერთხელ"), თესევსი, მასახარა და იულიუს კეისარი (შექსპირის "ზაფხულის ღამის სიზმარი", "მეფე ლირი" და "იულიუს კეისარი") , ჰეილი (მილერის "სეილემის პროცესი"), ტიპოტესკუ (კარაჯალეს "დაკარგული ბარათი"), დურსუნი და ჭეიშვილი (ნ. დუმბაძის "მზიანი ღამე" და საბრალდებო დასკვნა), მინდია (გამსახურდიას "ხოგაის მინდია"), შე ფუ, თავადი ყაზბეგი, ეფრეიტორი, ბერი (ბრეხტის "სეჩუანელი კეთილი ადამიანი" და "კავკასიური ცარცის წრე"), ტომი (ტ. უილიამზის "შუშის სამხეცე"), გიორგი ჯაფარიძე (რ. თაბუკაშვილის "რაიკომის მდივანი"), უჩა (თ. ჭილაძის "როლი დამწყები მსახიობი გოგონასათვის") და სხვა.