საქართველოს პრეზიდენტი მიხეილ სააკაშვილი ქართველ-ებრაელთა მსოფლიო კონგრესის ვიცე-პრეზიდენტის ჯემალ აჯიაშვილის გარდაცვალების გამო ღრმა მწუხარებას გამოთქვამს.
აღნიშნულის შესახებ პრეზიდენტის ადმინისტრაციის მიერ გავრცელებულ განცხადებაშია ნათქვამი.
"ღრმა მწუხარებას გამოვთქვამ ქართველ-ებრაელთა მსოფლიო კონგრესის ვიცე-პრეზიდენტის, მწერლისა და მთარგმნელის - ჯემალ აჯიაშვილის გარდაცვალების გამო. მისი ორიგინალური თარგმანით გამორჩეული პიესები არაერთხელ ყოფილა მსოფლიოს სხვადასხვა ქვეყნის მაყურებლის აღფრთოვანების საგანი. მას ნათარგმნი აქვს მრავალი მსოფლიო კლასიკური პოეზიის ნიმუში და ამასთანავე განსაკუთრებული წვლილი აქვს შეტანილი ებრაული კლასიკური პოეზიის ქართულად თარგმნის საკითხში. ბატონ ჯემალს ნამდვილად გამორჩეული ადგილი ეკავა, როგორც ქართულ-ებრაულ და მსოფლიო ლიტერატურაში, ასევე ჩვენს ერებს შორის ურთიერთობაში. კიდევ ერთხელ ვუსამძიმრებ ბატონი ჯემალის ოჯახსა და ახლობლებს და სრულიად საქართველოსთან ერთად ვიზიარებ მისი გარდაცვალებით გამოწვეულ ტკივილსა და მწუხარებას", - ნათქვამია პრეზიდენტის განცხადებაში.