სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ მრევლს კიდევ ერთელ მოუწოდა, შობის ღამეს ფანჯრებში სანთელი აანთონ, _აღნიშნულის შესახებ უწმინდესმა სამების საკათედრო ტაძარში წირვის დასრულების შემდეგ ბრძანა.
"დღეს ვანთებთ სანთელს, ვდგამთ ფანჯრებში და ვთხოვთ ყოვლადწმინდა ღვთისმშობელს და მართალ იოსებს, რომელნიც ეძებენ სასტუმროს, შემოვიდნენ ჩვენს სახლებში, საქართველოში და ჩვენთან იშვას ქრისტე. ეს არის საოცარი ტრადიცია და დღეს ამას გავაკეთებთ", _ბრძანა პატრიარქმა და მრევლს დამდეგი შობა მიულოცა.
ქადაგების დასასრულების შემდეგ, სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ თბილისის სასულიერო აკადემიასა და სემინარიაში ხანგრძლივი, ნაყოფიერი პედაგოგიური მოღვაწეობისათვის და საპატრიარქოს წმინდა ანდრია პირველწოდებულის სახელობის უნივერსიტეტის განვითარებაში შეტანილი წვლილისთვის ამავე უნივერსიტეტის რექტორი, ისტორიის მეცნიერებათა დოქტორი, პროფესორი სერგო ვარდოსანიძე საქართველოს ეკლესიის უმაღლესი ჯილდოთი, წმინდა გიორგის ოქროს ორდენით დააჯილდოვა.
