2012 წლის 27 დეკემბერს, 12 საათზე, სსიპ „საზღვაო ტრანსპორტის სააგენტოს" დირექტორი, მამუკა ახალაძე და იუსტიციის სამინისტროს „სახელმწიფო სერვისების განვითარების სააგენტოს" თავმჯდომარე, ლევან სამადაშვილი ერთობლივ ღონისძიებას ბათუმის იუსტიციის სახლში გამართავენ.
სსიპ "საზღვაო ტრანსპორტის სააგენტომ" შეიმუშავა პროექტი, რომლის საშუალებითაც მეზღვაურის წიგნაკების, მეზღვაურის კომპეტენციისა და კვალიფიკაციის დამადასტურებელი დოკუმენტების სრული განახლება განხორციელდა. 2013 წლიდან, ქართველი მეზღვაურები საერთაშორისო სტანდარტების დონის წიგნაკებსა და სერტიფიკატებს მიიღებენ.
აღნიშნული პროექტი"საზღვაო ტრანსპორტის სააგენტომ" იუსტიციის სამინისტროს "სახელმწიფო სერვისების განვითარების სააგენტოს" დახმარებით განახორციელა. აღნიშნულ სააგენტოს გააჩნია დიდი გამოცდილება დოკუმენტების მოწესრიგებისა და სერვისების გამართვის კუთხით; შესაბამისად,„საზღვაო ტრანსპორტის სააგენტოსა" და „სახელმწიფო სერვისების განვითარების სააგენტოს" შორის გაფორმდა ხელშეკრულება, რის საფუძველზეც გადაწყდა, რომ 2013 წლის 3 იანვრიდან ქართველ მეზღვაურთა წიგნაკის, კომპეტენციისა და კვალიფიკაციის დამადასტურებელი დოკუმენტების ბეჭდვას (მომავალში კი გაცემას) განახორციელებს "სახელმწიფო სერვისების განვითარების სააგენტო".