თბილისში, ლეონიძის ქუჩაზე, სებ-ის ყოფილი შენობის ბედი გაურკვეველია. გავრცელებული ინფორმაციით, დედაქალაქის ცენტრში, პრესტიჟულ ადგილზე განთავსებულ შენობაში სამომავლოდ სასტუმროს განთავსება იგეგმება. თუმცა, როგორც სააგენტო „ჯი-ეიჩ-ენს" ეკონომიკისა და მდგრადი განვითარების მინისტრის მოადგილემ დიმიტრი ქუმსიშვილმა განუცხადა, შენობის ბედი ამ დროისათვის გადაწყვეტილი არ არის და ამ დროისათვის უცნობია, თუ რა განთავსდება შენობაში და საერთოდ დაექვემდებარება თუ არა აღნიშნული შენობა პრივატიზაციას. მინისტრის მოადგილის თქმით, შენობა ამ დროისათვის სებ-ის მფლობელობაშია.
შეგახსენებთ, რომ საქართველოს ეროვნულმა ბანკმა მისამართი შეიცვალა და 17 დეკემბრიდან ადმინისტრაციული ოფისი თბილისში, სანაპიროს 2 ნომერში განთავსდა.
"დღემდე საქართველოს ეროვნული ბანკი რამდენიმე შენობაში იყო განთავსებული, რაც, თავისთავად, აფერხებდა მის ეფექტურ ფუნქციონირებას, გარდა ამისა ამორტიზებული შენობები ვეღარ პასუხობდა დაცვისა და უსაფრთხოების თანამედროვე მოთხოვნებს. ინფრასტრუქტურის განვითარებაზე ზრუნვა ეროვნულმა ბანკმა, ახალი, საერთაშორისო სტანდარტების შესაბამისი საკასო ცენტრის მშენებლობით დაიწყო. თანამედროვე ტექნოლოგიებით აღჭურვილი საკასო ცენტრი 2012 წლის ივნისში გაიხსნა და დღეს უკვე საერთაშორისოდ აღიარებული ნორმების მიხედვით, დაცვისა და უსაფრთხოების ავტომატიზირებული სისტემებით მიმდინარეობს ნაღდ ფულთან და ფასეულობებთან დაკავშირებული ყველა ოპერაცია.
17 დეკემბრიდან ეროვნული ბანკის ყველა ადმინისტრაციული ერთეული ერთ შენობაში სანაპიროს 2 ნომერში აგრძელებს საქმიანობას. ამ შენობის პირველ სართულზე განთავსებულია მომხმარებელთა უფლებების დაცვის განყოფილება, სადაც ეროვნული ბანკის თანამშრომლები კვალიფიციურ პასუხსა და რჩევებს აძლევენ დაინტერესებულ პირებსა თუ ფინანსური სექტორის მომხმარებლებს"- განმარტავენ ეროვნულ ბანკში.
