სტრასბურგის კინოთეატრ "ოდისეაში" ქართული კულტურის დღეების ფარგლებში, ქართული ფილმების კვირეული მიმდინარეობს. პროგრამის ფარგლებში წარმოდგენილი იქნება საქართველოს მიერ წარმოებული თანამედროვე ფილმები, ასევე ქართული კინოკლასიკა.
ფილმებს წარადგენენ რეჟისორები და ეროვნული კინოცენტრის წარმომადგენლები, სეანსის დასრულების შემდეგ მაყურებელს საშუალება ექნება, დაუსვას კითხვები ფილმების რეჟისორებს.
კინოჩვენება გაიხსნა ოთარ იოსელიანის ფილმით "შანტრაპა". პროგრამის ფარგლებში ნაჩვენები იქნება "გიორგობისთვე" - ოთარ იოსელიანი 1966; "ცისფერი მთები" - ელდარ შენგელაია 1983; "გაღმა ნაპირი" - გიორგი ოვაშვილი 2009; "ქეთო და კოტე" - ვახტანგ ტაბლიაშვილი, შალვა გედევანიშვილი 1948; "ჩემი ბებია" - კოტე მიქაბერიძე 1929; "ქუჩის დღეეები" - ლევან კოღუაშვილი 2010.
კინოთეატრი "ოდისეა" XX საუკუნის 30-იან წლებშია აშენებული. მისი პროგრამა დღემდე შედგენილია ფილმებისგან, რომლებიც მაღალი მხატვრული ღირებულებით გამოირჩევა.
სტრასბურგში ქართული კინოს დღეების ორგანიზატორია ეროვნული კინოცენტრი. ქართული კინოს კვირეული საფრანგეთში გრანდიოზული საშობაო ბაზრობისა და ქართული კულტურის დღეების ფარგლებში იმართება, რომელსაც საქართველოს კულტურისა და ძეგლთა დაცვის სამინისტრო მართავს. ქართული ფილმების კვირეული 22 დეკემბრამდე გაგრძელდება.
