იტალიის ბოლცანოს მუმიის ინსტიტუტის არქეოლოგებმა, ფარაონ რამზეს III-ისა და მისი სავარაუდო ძის მუმიების შესწავლა დაასრულეს და მივიდნენ იმ დასკვნამდე, რომ ფარაონი, მართლაც, შეთქმულების შედეგად დაიღუპა. მეცნიერები სიმართლესთან ყველაზე ახლოს მდგარ ვერსიად ფარაონისთვის ყელის გამოჭრას ასახელებენ. ინფორმაციას ამის შესახებ "ბი-ბი-სი" British Medical Journal-ში გამოქვეყნებულ სტატიაზე დაყრდნობით ავრცელებს.
კომპიუტერული ტომოგრაფის მეშვეობით მუმიიის "გაშუქების" შემდეგ, მეცნიერებმა მას ყელზე დიდი ნაკვეთი ჭრილობა აღმოუჩინეს - 7 სმ სიგრძის: გადაჭრილი ჰქონდა ხორხი და ყველა მსხვილი სისხლძარღვი. ჭრილობის შიგნით აღმოჩენილია ამულეტი (მეფური ძალაუფლების სიმბოლო) ეს კი იმას ნიშნავს, რომ ჭრილობა მუმიფიცირების დაწყებამდე არ შეხორცებულა.
წერილობითი წყაროების თანახმად, მმართველი, შესაძლოა, საკუთარ ვაჟს და ერთ-ერთ ცოლთაგანს, ტეიეს ჩამოეგდოთ. აქამდე უცნობი იყო, მმართველმა გადატრიალება გადაიტანა, თუ ის შეთქმულებმა მოკლეს. მეცნიერების გამოკვლევები მოწმობენ, რომ რამზეს III მოკლეს. მოვლენები კი, რომლებზედაც არის საუბარი, ჩვენს წელთაღრიცხვამდე XII-XI საუკუნეებს განეკუთვნება.
მას შემდეგ, რაც რამზეს III-ის მკვლელობის გარემოებები გაარკვიეს, მეცნიერები მისი სავარაუდო მკვლელის მუმიის ანალიზს შეუდგნენ. არქეოლოგებმა მუმიის ძვლებიდან გენეტიკური მასალა ამოიღეს და ისინი ერთმანეთს შეადარეს. ანალიზმა დაადასტურა, რომ ფარაონი და 18 -20 წლის მამაკაცი მამა-შვილი იყვნენ.
ამის შემდეგ მეცნიერებმა მისი შვილის გარდაცვალების საიდუმლოს ამოხსნა სცადეს და ტომოგრაფის მის გადაღებული გამოსახულებების ანალიზი ჩაატარეს. ამან მათ საშულაება მისცა დაენახათ რამდენადმე უცნაური გარემოება ბიჭის დაკრძალვისა.
პირველ ყოვლისა, თვალში საცემი იყო ის, რომ მუმიფიკაციის პროცესის დროს მისი შინაგანი ორგანიები და ტვინი ორგანიზმიდან არ ამოუტანიათ - ეს იმ დროის სამეფო ოჯახის წევრთა დაკრძალვის ყველა რიტუალს ეწინააღმდგებოდა. ამას გარდა, ახალგაზრდა მამაკაცის გვამი თხის ტყავში იყო გახვეული, რომელიც იმ დროისთვის "უწმინდურად" მიიჩნეოდა და ასევე ეწინააღმდეგებოდა სამეფო პერსონების დაკრძალვის რიტუალს. ამას გარდა, მის კისერზე და ყელზე მეცნიერებმა უამრავი ნაკეცი აღმოაჩინეს, მისი გულმკერდის არე კი არაბუნებრივად გაფართოებული იყო. ამან მეცნიერებს მისცა საშუალება, გაჩენილიყო ვარაუდი, რომ ახალგაზრდა მამაკაცი ცოცხლად დამარხეს ან დამარხვამდე ძალიან ცოტა ხნით ადრე გაგუდეს.
ამდენად, მეცნიერებმა დაადგინეს, რომ რამზეს III, მართლაც, შეთქმულებას ემსხვერპლა, რომელსაც მისი ვაჟი და ცოლი მეთაურობდნენ. ეს ახალი მონაცემები კი, თავის მხრივ, საშუალება მისცემს ეგვიპტოლოგებს, გაშიფრონ ერაზროვანი წარწერები ე.წ. ტურინის პაპირუსზე, სადაც საუბარია ტეიესა და მისი თანამზრახველების სასამართლოზე.
