დღეიდან პარლამენტში პლენარული სხდომები ყოველდღიურ რეჟიმში გაიმართება. ვინაიდან მიმდინარე კვირა საშემოდგომო სესიის ბოლო სასესიო კვირაა და საკანონმდებლო ორგანოს არაერთი მნიშვნელოვანი კანონპროექტი აქვს მისაღები, პარლამენტის თავმჯდომარის გადაწყვეტილებით, 21 დეკემბრის ჩათვლით პლენარული სხდომები ყოველდღე ჩატარდება.
მიმდინარე კვირაში პარლამენტმა ამნისტიის შესახებ კანონპროექტი და ასევე, 2013 წლის სახელმწიფო ბიუჯეტი უნდა დაამტკიცოს. ამ საკითხებზე დღესვე ბიუროს სხდომაზე იმსჯელებენ.
2013 წლის ბიუჯეტი 8 მილიარდ 730 მილიონი ლარით განისაზღვრა. პრიორიტეტულია ჯანდაცვა, განათლება, სოფლის მეურნეობის განვითარება და სასჯელაღსრულების სისტემა.
რაც შეეხება ამნისტიას, ის განსაკუთრებით ჰუმანური არასრულწლოვნებისა და ქალების მიმართ იქნება. სიაში მოხვდებიან ეკონომიკური და გაუფრთხილებლობით ჩადენილი დანაშაულით გასამართლებული პირები და ნარკომომხმარებლები.