პრეზიდენტის გადაწყვეტილებით, სტრატეგიული განვითარების სააგენტო უქმდება. ბრძანებულება, რომელიც საკანონმდებლო მაცნეში უკვე გამოქვეყნებულია, მიხეილ სააკაშვილმა 14 დეკემბერს გამოსცა.
პრეზიდენტის გადაწყვეტილებით, სააგენტოს ლიკვიდაციასთან დაკავშირებული კანონმდებლობით გათვალისწინებული ღონისძიებების განხორციელება ეკონომიკისა და იუსტიციის სამინისტროებს მიმდინარე წლის 17 დეკემბრამდე უნდა დაესრულებინათ, ქონების ნაწილში სააგენტოს უფლებამონაცვლედ კი, უშუალოდ იუსტიციის სამინისტროა განსაზღვრული.
სტრატეგიული განვითარების სააგენტო პრეზიდენტის 2012 წლის 19 აპრილის ბრძანებულებით შეიქმნა და მისი მთავარი ფუნქცია ტურისტულ ინფასტრუქტურასთან დაკავშირებული პროექტების კოორდინირება იყო. პროექტები ბიუჯეტთან ერთად საერთაშორისო გრანტებითაც ფინანსდებოდა. სტრატეგიული განვითარების სააგენტო ახალი ქალაქის, ლაზიკის მშენებლობის, ასევე კახეთისა და იმერეთის რეაბილიტაციის პროექტებზე მუშაობდა.
