ახალი წლის მოახლოებასთან დაკავშირებით, რადიო „დარდიმანდი" თავის ერთგულ მსმენელს სიურპრიზს უმზადებს. ღონისძიება, რომელშიც რადიო „დარდიმანდი"-ს მსმენელისთვის საყვარელი წამყვანები იღებენ მონაწილეობას, 17 დეკემბერს 20:00 საათზე რესტორან „ბერმუხა"- ში გაიმართება.
მუსიკალურ ალბომში სახელწოდებით „მღერიან დარდიმანდის წამყვანები" წარმოდგენილი იქნება ყველასათვის ცნობილი ქართული სიმღერების ახლებური ვერსიები, რადიოს წამყვანების შესრულებით.
„რადიო „დარდიმანდმა" გადაწყვიტა წინასაახალწლოდ საჩუქარი გაეკეთებინა ერთგული მსმენელისთვის. არც ერთ ქართულ რადიოს მსგავსი პროექტი არ განუხორციელებია. ალბომში წარმოდგენილია მსმენელთა მიერ ყველაზე ხშირად მოთხოვნადი მუსიკალური ნომრები განსხვავებული ინტერპრეტაციით და „დარდიმანდი"-ს წამყვანების შესრულებით. ალბომის CD ვერსია მოწვეულ სტუმრებს საჩუქრად გადაეცემათ და მისი სარეალიზაციოდ ქსელში ჩაშვება არ იგეგმება" - განაცხადა „ბერმუხა"-ს პიარ-მენეჯერმა თამუნა მუსერიძემ.
გარდა რადიოს წამყვანებისა, ღონისძიებაზე მიწვეულია უამრავი მომღერალი და საზოგადოებისთვის ცნობილი სახე. კონცერტში მონაწილეობას მიიღებენ: დათო გომართელი, ეთერ კაკულია, ნინო ხეიძე, დიტო ქისიშვილი, ოთო კოვზირიძე, გიორგი შანიძე, ალეკო თეთრაშვილი, ვახო ბიჭიკაშვილი, თამთა ასათიანი, ნატუკა გულისაშვილი და ანსამბლი „ადილა".
