2012 წლის 15 დეკემბერს ქ. სტამბოლში, თურქეთის რესპუბლიკა, გაიმართა შავი ზღვის ეკონომიკური თანამშრომლობის ორგანიზაციის (BSEC) წევრი ქვეყნების საგარეო საქმეთა მინისტრების საბჭოს (CMFA) სხდომა, რომელსაც 13-14 დეკემბერს, მომზადების მიზნით, წინ უსწრებდა BSEC-ის უფროსი თანამდებობის პირთა კომიტეტის (CSO) შეხვედრა.
საქართველოს დელეგაციას ხელმძღვანელობდა საქართველოს საგარეო საქმეთა მინისტრი, ქალბატონი მაია ფანჯიკიძე, რომელმაც სიტყვით მიმართა დამსწრე საზოგადოებას.
მინისტრმა ხაზი გაუსვა BSEC-ის როლს რეგიონში ეკონომიკური თანამშრომლობის გაღრმავების საკითხში. მან ყურადღება გაამახვილა სავაჭრო ურთიერთობების გაღრმავების აუცილებლობაზე, რაც წარმატებული რეგიონალური ეკონომიკური თანამშრომლობის წინაპირობაა.
მინისტრმა აღნიშნა, რომ BSEC-ში არსებული კონფლიქტები და პოლიტიკური უთანხმოებები ხელს უშლის წარმატებული ეკონომიკური თანამშრომლობის განვითარებას. აღნიშნულთან დაკავშირებით, მან იმედი გამოთქვა, რომ BSEC-ი ყურადღებას გაამახვილებს წევრ ქვეყნებს შორის არსებული პოლიტიკური უთანხმოებების გადაწყვეტაზე და შეიმუშავებს აღნიშნულ პრობლემებზე კონსულტაციების ქმედით მექანიზმებს.
მინისტრთა საბჭომ განიხილა, BSEC-ის სამომავლო ეკონომიკური დღის წესრიგის განახლების შესახებ დოკუმენტის იმპლემენტაციის მიმდინარეობა, BSEC-ის სხვადასხვა სამუშაო ჯგუფების საქმიანობა, BSEC დამკვირვებლის სტატუსის განახლებისა და ფინანსური საკითხები, ასევე BSEC-ისა და ევროკავშირის თანამშრომლობა.