,,საქართველოს საერთაშორისო თანამეგობრობის მხრიდან სრული მხარდაჭერა აქვს ქართულ-რუსული დიალოგის აღდგენის პროცესში", -განაცხადა ჟურნალისტებთან სახელმწიფო მინისტრმა ევროპულ და ევროატლანტიკურ სტრუქტურებში ინტეგრაციის საკითხებში ალექსი პეტრიაშვილმა რუსეთ-საქართველოს ურთიერთობის აღდგენის კომენტირებისას.
მისივე განცხადებით, ზურაბ აბაშიძისა და გრიგორი კარასინის შეხვედრის შემდეგ ცნობილი გახდება, თუ როგორ, რა ფორმატით გაგრძელდება მხარეებს შორის ურთიერთობა.
,,ეს არის პირველი არაფორმალური საუბარი, სადაც ჟენევის ფორმატი რჩება უმთავრეს მოლაპარაკების საგნად რუსეთთან კონფლიქტების მოგვარების საკითხში. რაც შეეხება სხვა საკითხებს და შესაძლო ურთიერთობის ფორმებს ამაზე საუბარი იყო კონკრეტულად ეკონომიკის, სავაჭრო, კულტურული ურთიერთობის აღდგენის მიმართულებით და ამ საკითხებს აუცილებლად შეეხებიან ბატონი ზურაბ აბაშიძე და ბატონი კარასინი. მათი პირველი შეხვედრის შემდეგ უკვე გამოიკვეთება, თუ როგორ გაგრძელდება და განვითარდება რუსულ-ქართული ურთიერთობის ეს არხი და კომუნიკაცია", - განაცხადა ჟურნალისტებთან პეტრიაშვილმა და აღნიშნა, რომ საქართველოს საერთაშორისო თანამეგობრობის მხრიდან საყოველთაო მხარდაჭერა აქვს ,,ქართულ-რუსული" ურთიერთობების აღდგენის პროცესში.
შეგახსენებთ, რომ გრიგორი კარასინსა და ზურაბ აბაშიძეს შორის შეხვედრა შვეიცარიაში დღეს გაიმართება.
