სს „თელასიდან" გათავისუფლებული თანამშრომლების საკითხის მოგვარების მიზნით ენერგეტიკის სამინისტროში შექმნილი კომისიის მუშაობის პირველი ეტაპი წარმატებით დასრულდა. 107 ყოფილი თანამშრომლიდან 73-მა ხელახლა დაიწყო მუშაობა კომპანიაში.
დარჩენილ ყოფილ თანამშრომლებთან მუშაობს კომპანია „თელასის" ადმინისტრაცია- მათ მიმართ იქნება ინდივიდუალური შეთავაზებები გამოცდილებისა და კვალიფიკაციის გათვალისწინებით. სს „თელასიდან" გათავისუფლებული თანამშრომლების ხელახალი დასაქმების პროცესი პერმანენტულად ხორციელდება და უახლოეს დროში დასრულდება.
„ჩვენ დიდი გულისყურით ვეკიდებით შექმნილ ვითარებას და ყველაფერს გავაკეთებთ საკითხის უმოკლეს დროში მოსაგვარებლად, კომპანიის ხელმძღვანელად დანიშვნის დღიდან აქტიურად ვარ ჩართული ამ პროცესში. ამასთანავე, მინდა გამოვყო ენერგეტიკისა და ბუნებრივი რესურსების სამინისტროს პოზიტიური მიდგომა გათავისუფლებული თანამშრომლების საკითხის მოგვარებაში" - განაცხადა „თელასის" გენერალურმა დირექტორმა დევი კანდელაკმა.
სპეციალური კომისია სს „თელასიდან" გათავისუფლებული თანამშრომლების საკითხის მოგვარების მიზნით ოქტომბერში ენერგეტიკის და ბუნებრივი რესურსების მინისტრის კახა კალაძის ინიციატივით შეიქმნა. კომისიის შემადგენლობაში სამინისტროს, სს „თელასის" და კომპანიის პროფკავშირების წარმომადგენლები შედიან. კომისიის წევრები განიხილავენ თითოეული გათავისუფლებული თანამშრომლის საქმეს ინდივიდუალურად და იღებენ შესაბამის გადაწყვეტილებას.