საქართველოს პრემიერ-მინისტრის წარმომადგენელს ზურაბ აბაშიძესა და რუსეთის საგარეო საქმეთა მინისტრის მოადგილეს გრიგორი კარასინს შორის ჟენევაში გამართულ შეხვედრაზე აფხაზეთსა და ცხინვალის რეგიონის სტატუსის შესახებ თემის განხილვა არ იქნება. განცხადება ამის შესახებ რუსეთს საგარეო საქმეთა მინისტრის მოადგილემ გრიგორი კარასინმა გააკეთა.
მისივე თქმით, რუსეთის ფედერაციის "პრინციპული პოზიციაა" ის, რომ სეპარატისტების გარეშე რუსეთი მათ შესახებ საკითხის განხილვას არ აპირებს.
"აფხაზეთსა და სამხრეთ ოსეთთან დაკავშირებულ საკითხებს თავად აფხაზებისა და ოსების მონაწილეობის გარეშე ჩვენ არ შევეხებით. ეს რუსეთის პრინციპული პოზიციი და მას არ გადავალთ", _ განაცხადა გრიგორი კარასინმა.
შეგახსენებთ, რომ 2008 წლის 7 აგვისტოს, ღამით, რუსეთის ფედერაციამ ვერაგულად დაარღვია საქართველოს დამოუკიდებელი რესპუბლიკის სუვერენული საზღვრები და მის ტერიტორიაზე ცხინვალის რეგიონის მხრიდან, როკის გვირაბის გავლით შემოიჭრა. რუსეთის ფედერაციამ საბრძოლო მოქმედებები დაიწყო ასევე რუსეთის მოსაზღვრე საქართველოს მეორე რეგიონში - აფხაზეთში.
რუსეთ-საქართველოს ხუთდღიანი ომის შედეგად რუსეთის ფედერაციამ საქართველოს ორი რეგიონის - აფხაზეთისა და ცხინვალის რეგიონის ოკუპაცია მოახდინა და ის მყოფი სეპარატისტების ე.წ. დამოუკიდებლობა 2008 წლის 26 აგვისტოს აღიარა.
დღემდე რუსეთის ფედერაცია უგულვებელყოფს 2008 წლის 12 აგვისტოს ცეცხლის შეწყვეტის, ძალების გაყვანისა და მათ კონფლიქტამდე არსებული დისლოკაციის ადგილზე დაბრუნების ხელშეკრულების შესრულებას, რომელსაც ხელი საქართველოს, საფრანგეთისა და რუსეთის პრეზიდენტება მოაწერეს. ამ ხელშეკრულების მიხედვით, რუსეთის ფედერაციამ თავისი სამხედრო ძალა 2008 წლის 7 აგვისტომდე არსებულ პოზიციებზე უნდა დააბრუნოს. ამჟამად, საქართველოს ეს ორი რეგიონი რუსეთის ოკუპაციის ქვეშ იმყოფება.
