სირიელი მებრძოლები, რომლებმაც ოქტომბერში უკრაინელი ჟურნალისტი, ანხარ კოჩნევა გაიტაცეს, უკრაინის საგარეო საქმეთა სამინისტროს განცხადების შემდეგ, ჟურნალისტის მკვლელობით იმუქრებიან. გამტაცებლებმა ექსტრემისტულ ინტერნეტ-საიტებზე მუქარის წერილები უკვე გამოაქვეყნეს.
უკრაინის მთავარმა დიპლომატიურმა უწყებამ განცხადება გაავრცელა, სადაც აღნიშნავდა, რომ დამასკოს სთხოვს, ყველაფერი გააკეთოს ჟურნალისტის გადასარჩენად.
მცირე ხნით ადრე კი, გამტაცებლებმა მუქარის ვიდეო ჩაწერეს, რომელიც სოციალურ ქსელებში გავრცელდა. ვიდეოში ჟურნალისტ ქალს ისინი „ჯაშუშად" მოიხსენიებენ და ულტიმატუმებს აყენებენ.
კოჩნევა სირიაში ერთი წლის წინ ჩავიდა. ჟურნალისტი უკრაინის მოქალაქეა, თუმცა, რუსულ მედიასაშუალებებთან თანამშრომლობდა. სირიიდან რეპორტაჟების გასაკეთებლად, ის, გადამღებ ჯგუფთან ერთად, ქვეყნის სხვადასხვა რეგიონებში, მათ შორის, ცხელ წერტილებში მოგზაურობდა. ოქტომბრის შუა რიცხვებში კოჩნევა მოულოდნელად დაიკარგა, ცოტა მოგვიანებით კი გავრცელდა ცნობა, რომ ის გაიტაცეს. პრეზიდენტმა იანუკოვიჩმა ჟურნალისტის საქმე პირად კონტროლზე აიყავანა, თუმცა მისი გათავისუფლება ამ დრომდე ვერ მოხერხდა.