რუსეთის ფედერაციის ხელისუფლება მინსკის მიერ აფხაზეთისა და სამხრეთ ოსეთის აღიარების საკითხს აღარ აყენებს. ეს განცხადება დღეს ბელარუსის პრეზიდენტმა ალექსანდრე ლუკაშენკომ დსთ-ის ქვეყნების, ბალტიისპირეთისა და საქართველოს მთავარი რედაქტორების კლუბის წევრებთან შეხვედრაზე გააკეთა. ინფორმაციას ამის შესახებ რუსული მედია ავრცელებს.
"ჩვენ, რუსეთის ხელისუფლებასთან ერთად, ეს გვერდი უკვე გადავფურცლეთ და მეტად აღარ მივუბრუნდებით", _ განაცხადა ლუკაშენკომ და აღნიშნა: "როდესაც დადგა აღიარება-არაღიარების საკითხი, ჩვენ იგი რუსეთის ხელისუფლებასთან განვიხილეთ (მაშინ - პრეზიდენტ დიმიტრი მედვედევთან). მაშინ ვიკითხე: რუსეთი ამის გარეშე ვერ იცოცხლებს? ანუ თუ ჩვენ ვაღიარებთ ან არ ვაღიარებთ? მე ვიკითხე: მზად არის რუსეთი თავის თავზე აიღოს ნეგატიური შედეგების მინიმიზაცია ბელარუსისთვის აფხაზეთისა და სამხრეთ ოსეთის აღიარების საკითხში? დიმიტრი ანატოლის ძემ თქვა: ეს სხვა საკითხია, ჩვენ მზად არ ვართ", _ განაცხადა ლუკაშენკომ.
"მთავარი კი ეს არის, რომ ჩვენი აღიარება - იქნებოდა ის თუ არ იქნებოდა - ეს ყულაბაში არც თქვენ დაგიმატებდათ რამეს და არც ჩვენ", _ განაცხადა ბელარუსის პრეზიდენტმა და აღნიშნა, რომ "ჩვენ და რუსეთი საქართველოს მთლიანობის მომხრენი ვართ".
"მაგრამ მასთან უნდა მივიდეთ. სააკაშვილის, ივანიშვილისა და აფხაზეთისა და სამხრეთ ოსეთის ხელმძღვანელობის გარეშე ეს საკითხი არ გადაწყდება",_ აღნიშნა ლუკაშენკომ.
"თუკი თქვენ მოელაპარაკებით აფხაზეთს, რუსეთს გაუხარდება. რუსეთის ხელისუფლება პირჯვარს გადაიწერს, თქვენ თუ მოილაპარაკებთ, მაგრამ ეს უნდა გააკეთოთ თქვენ და არა რუსეთმა", _ განაცხადა ბელარუსის პრეზიდენტმა და დასძინა, რომ "ეს რუსეთის პრობლემა არ არის. მას არ სჭირდება ეს კონფლიქტი".
"რუსეთს მიწა საკმარისი აქვს. მას არც აფხაზეთი და არც სამხრეთ ოსეთი არ სჭირდება", _ განაცხადა ბელარუსის პრეზიდენტმა.
ლუკაშენკომ განაცხადა, რომ ბელარუსს გაუხარდება თუ საქართველო მთლიანობას გაიმყარებს. "თუ წავა გამაერთიანებელი პროცესი, ჩვენ თქვენ გვერდით ვიქნებით", _ განაცხადა მან და კიდევ ერთხელ აღნიშნა, რომ საქართველოს დსთ-ში ხილვა სურს.
"თქვენ მაგივრად მე ვითხოვ თქვენს დსთ-ში გაწევრაინებას, თქვენ არაფერს დაკარგავთ და რუსეთიც მხოლოდ მომხრე იქნება", _ განაცხადა ბელარუსის პრეზიდენტმა.