"მე და ჩემი თითოეული მეგობარი, ვინც ციხეში არ იქნება დაჭერილი, ვინც არ იქნება დაკითხვაზე, მთელ დროს მოვანდომებთ, რომ "ნაციონალურმა მოძრაობამ" გააგრძელოს თავისი ფუნქციების შესრულება", - განაცხადა ივანე მერაბიშვილმა დაკითხვის შემდეგ და აღნიშნა, რომ "ნაციონალურმა მოძრაობამ" ჩამოაყალიბა სახელმწიფო, სადაც პატრული კარგად ჩაცმულია, შენობები არის გამთბარი და კომფორტული. ყოფილი შს მინისტრი და ყოფილი პრემიერ-მინისტრი ამაყობს, რომ კომფორტულ შენობაში მოუწია დაკითხვა.
მერაბიშვილის განცხადებით, განახლებული "ნაციონალური მოძრაობა" უზრუნველყოფს, რომ საქართველოს მოსახლეობამ მიიღოს ინფორმაცია იმ ვალდებულებებზე, სოციალურ საკითხებზე, რომლებიც სახელმწიფოს აქვს.
"ჩვენ გავაგრძელებთ მუშაობას, რათა საქართველოს თითოეულ მოქალაქეს ჰქონდეს საშუალება, ისარგებლოს ყველა იმ სიკეთით, რომელსაც იგი მიიღებს. ჩვენ გავაგრძელებთ ყოველდღე მუშაობას. მთავარ აქცენტს გავაკეთებთ ახალი წინადადებების შეთავაზებაზე, რათა ჩვენი ცხოვრება გახდეს გაცილებით უკეთესი", - განაცხადა მერაბიშვილმა.
შეგახსენებთ, რომ შსს საგამოძიებო სამსახურში ივანე მერაბიშვილი დაკითხვა მის მიერ საქართველოს საზღვრის ყალბი დოკუმენტაციით გადაკვეთის მცდელობის ფაქტზე აღძრული სისხლის სამართლის საქმის ფარგლებში მიმდინარეობდა.