ეუთოს საპარლამენტო ასამბლეის ბიუროს სხდომას დუბლინში ასამბლეის გენერალური მდივანი რიკარდო მილიორი უძღვებოდა. გიგი წერეთელი, როგორც ასამბლეის ვიცეპრეზიდენტი, თავის გამოსვლაში შეეხო ორგანიზაციის მუშაობის უფრო ეფექტური წარმოების, მიღებული გადაწყვეტილებების იმპლემენტაციის საკითხებს და შესაბამისი მონიტორინგის გაძლიერების აუცილებლობას. განსაკუთრებით გაუსვა ხაზისაქართველოსათვის მნიშვნელოვან რეზოლუციებს დევნილთა დაბრუნებისა და ეუთოს მისიის აღდგენის თაობაზე.
გიგი წერეთელმა მადლიერება გამოხატა საპარლამენტო არჩევნების პროცესში ეუთოს ჩართულობისა და აქტიური სადამკვირვლებლო მისიის ორგანიზებისათვის. ამავე დროს აღნიშნა, რომ არჩევნების შემდგომი პერიოდი განსაკუთრებით მნიშვნელოვანია იმისთვის, რომ დემოკრატიული განვითარება გაგრძელდეს და ახალი ხელისუფლება ხელს უწყობდეს მშვიდობიან თანაცხოვრებას და იცავდეს კანონის უზენაესობას. მან მიმართა ასამბლეის ხელმძღვანელობას, რომ აქტიურად ჩაერთოს პოსტსაარჩევნო პროცესის მონიტორინგში და ხელი შეუწყოს საქართველოში პოლიტიკურ სტაბილურობას, ეკონომიკურ განვითარებას და ადამიანის უფლებების დაცვას.
ამ საკითხებთან დაკავშირებით მხარდაჭერა გამოთქვეს ბიუროს წევრებმაც ვიცე-პრეზიდენტმა ტონინო პიცულამ, რომელიც ხელმძღვანელობდა სადამკვირვებლო მისიას. მან აღნიშნა, რომ რთული წინასაარჩევნო პროცესის მიუხედავად საქართველოს მოსახლეობამ თავისუფლად გამოხატა თავისი ნება და საბოლოოდ საპარლამენტო არჩევნები დემოკრატიული სტანდარტების შესაბამისად ჩატარდა. თუმცა, არჩევნების შემდგომ ვითარებაზე ბევრი კრიტიკული მოსაზრებაა და მხარი დაუჭირა ეუთოს ჩართვას ამ კუთხით.
ასამბლეის სპეციალურმა წარმომადგენელმა სამხრეთ კავკასიაში ჯოაო სოარესმა გამოხატა მზადყოფნა უახლოეს პერიოდში მისიასთან ერთად ჩამოვიდეს საქართველოში და ადგილზე შეისწავლოს ვითარება.
ასამბლეის პრეზიდენტმა რიკარდო მილიორიმ აღნიშნა, რომ საქართველოში მიმდინარე პროცესები ყურადღების ცენტრშია და კოჰაბიტაცია აუცილებელია იმისთვის. რომ არ მოხდეს ქვეყნის განვითარების შეფერხებადა ასევე ხაზი გაუსვა საქართველოში ეუთოს მისიის განახლების აუცილებლობას. მან განაცხადა, რომ უახლოეს პერიოდში დელეგაციასთან ერთად ჩამოვა საქართველოში.
გიგი წერეთელი განაგრძობს სამუშაო ვიზიტს ეუთოს მინისტერიალის ფარგლებში, რომელიც დუბლინში მიმდინარეობს.