დღეს 7 დეკემბერს, 18:00 საათზე, აკაკი ხორავას სახელობის თეატრის მოღვაწეთა კავშირის დარბაზში (მისამართი: გ.ლეონიძის ქუჩა N11, სოლოლაკი), გაიმართება საზოგადოებრივი მოძრაობა ,,ლაზარეს" შეხვედრა საზოგადოებისა და მედიის წარმომადგენლებთან.
საზოგადოებრივი მოძრაობა ,,ლაზარე", რომელიც 1 ოქტომბრის საპარლამენტო არჩევნების შემდეგ შეიქმნა უწმინდესისა და უნეტარესის, სრულიად საქართველოს კათოლიკოს პატრიარქის ილია მეორის ლოცვა-კურთხევით, წარმოადგენს მოქალაქეთა აპოლიტიკურ, არაკომერციულ გაერთიანებას, რომელშიც გაერთიანებულნი არიან ჩსაზოგადოების კულტურის, მეცნიერებისა და ხელოვნების ღვაწლმოსილი წარმომადგენლები.
მოძრაობა ,,ლაზარეს" მიზანია ქვეყანაში მიმდინარე პროცესებზე მონიტორინგი და მათი ანალიზი, ქვეყანაში საზოგადოებრივი სექტორის გააქტიურების გზით მონიტორინგის გაწევა საქართველოს სახელმწიფოებრივი პოლიტიკის სამართლებრივ ფორმირებასა და მის თანამიმდევრულად განხორციელებაზე. მოძრაობა ასევე განახორციელებს მონიტორინგს ხელისუფლების საქმიანობაზე შემდეგ სფეროებში: 1.დემოკრატიული ინსტიტუტების განვითარებაზე; 2.საარჩევნო პროცესებზე; 3.მედიაზე; 4.განათლებაზე; 5. კულტურის(კულტურულ მემკვიდრეობის) დაცვაზე; 6.სამედიცინო სფეროს სრულფასოვან განვითარებაზე; 7. სოფლის მეურნეობის განვითარების ჯეროვან ხელშეწყობაზე; 8.ეკო-სისტემის (ბუნებისა და გარემოს) დაცვის უზრუნველყოფაზე; 9. სახელმწიფოსა და ეკლესიას შორის დადებული კონკორდატის შესრულებაზე; 10. სოციალურ, მეცნიერულ და სხვა სფეროებში.
მოძრაობის მიზანია ილია ჭავჭავაძის ,,საერთო ნიადგის" თეორიის როგორც ქართული პოლიტიკური ფილოსოფიის უმნიშვნელოვანესი საფუძვლის სახელისუფლებო ორგანოებისთვის რეკომენდაციის შემუშავებას, რაც გულისხმობს ეროვნულ-სახელმწიფოებრივი იდეოლოგიის, დარგობრივი კონცეფციების, საქართველოს ბუნებრივ-ისტორიული განვითარების მიხედვით საქართველოს კონსტიტუციის ამოქმედებას, საქართველოს სამოქალაქო საზოგადოების ჩამოყალიბების ხელშეწყობას.
საზოგადოებრივი მოძრაობა ,,ლაზარეს' დამფუძნებელი და თავმჯდომარეა ქართველი პოეტი და საზოგადო მოღვაწე რეზო ამაშუკელი.