თბილისის საქალაქო სასამართლო ხუთივე ბრალდებული დამნაშავედ ცნო წარდგენილ ბრალდებაში, ვახტანგ ფურცელაძეს, რომელსაც ასევე ნარკოტიკული დანაშაული ედებოდა ბრალად, დანაშაულთა ერთობლიობით სასჯელთა ნაწილობრივი შეკრების პრინციპის გამოყენებით, სასჯელის სახედ დაზომად განესაზღვრა 12 წლით თავისუფლების აღკვეთა, ხოლო ვახტანგ ირემაძეს, მერაბ ლაშქარეიშვილს, ასევე, ძებნაში მყოფ გაგა ავალიანს და ლაშა გელხვიძეს სასჯელის სახით 7 წლისა და 6 თვის ვადით თავისუფლების აღკვეთა განესაზღვრათ.

თბილისის საქალაქო სასამართლოს ინფორმაცით, მათ ბრალად ედებოდათ თურქეთის რესპუბლიკაში, ქალაქ ორდუს საიუველირო მაღაზიიდან ძვირფასი ნივთების ქურდობა, ჩადენილი ორგანიზებული ჯგუფის მიერ (საქართველოს სსკ-ის 177-ე მუხლის მე-4 ნაწილის ა, ბ).ბრალდებულ ვახტანგ ფურცელაძეს ასევე ბრალად წარედგინა ნარკოტიკული საშუალების უკანონო შეძენა, შენახვა, იმის მიერ ვისაც წინათ ჩადენილი აქვს ნარკოტიკული დანაშაული (საქართველოს სსკ-ის 260-ე მუხლის მე-2 ნაწილის ე )და ნარკოტიკული საშუალების ექიმის დანიშნულების გარეშე უკანონოდ მოხმარება ((საქართველოს სსკ-ის 273-ე მუხლი).

საქმის მასალების მიხედვით: თურქეთის რესპუბლიკის ტერიტორიაზე 2012 წლის იანვრში, ბრალდებულებმა საიუველირო მაღაზიიდან ძვირფასი ნივთების ქურდობის მიზნით, ჩამოაყალიბეს დანაშაულებრივი ორგანიზებული ჯგუფი და შეკავშირდნენ. 2012 წლის 5 მარტს, ქალაქ ორდუში, თურქეთის დროით დაახლოებით ღამის 3 საათზე, საქართველოს მოქალაქეებმა ვახტანგ ფურცელაძემ, ვახტანგ ირემაძემ, მერაბ ლაშქარეიშვილმა, გაგა ავალიანმა და ლაშა გელხვიიძემ წინასწარ გათხრილი გვირაბით შეაღწიეს საიუველირო მაღაზიაში და მართლსაწინააღმდეგო მისაკუთრების მიზნით, ფარულად დაეუფლნენ 639005,6 თურქული ლირის (606799,7 ლარი) ღირებულების ოქროს საიუველირო ნაკეთობებს, 5000 თურქული ლირას (4748 ლარი) ნაღდი ფულის სახით და 4000 თურქული ლირის (3798,4 ლარი) ღირებულების იარაღს. აღნიშნულმა პირებმა (გიორგი ხარატიშვილის გარდა, რომელიც 2012 წლის 27 თებერვალს შემოვიდა საქართველოში) სასაზღვრო-გამშვები პუნქტ "სარფის" გავლით, დანაშაულის ჩადენის დღესვე შეძლეს საზღვრის გადმოკვეთა და მოპარული ნივთების საქართველოში შემოტანა.

ორგანიზებული ჯგუფის წევრებმა ფარულად დაუფლებული ნივტებიდან 430 გრამი ოქროს ნაკეთობების რეალიზება მალევე მოახერხეს, ვახტანგ ფურცელაძემ ე.წ "სამეული" ერთ-ერთ ნათესავს აჩუქა, ხოლო ერთი ნაკეთობა (ბეჭედი) ახლობლის საცხოვრებელ სახლში დარჩა. მოპარული ძვირფასეულობის ნაწილს მერაბ ლაშქარეიშვილი საცხოვრებელ სახლში ინახავდა და პარალელურად, ორგანიზებული ჯგუფის წევრები მოპარული ნივთების რეალიზაციის თაობაზე მოლაპარაკებებს აწარმოებდნენ საქართველოს მოქალაქე ალექსანდრე ნ.-სთან.
გამოძიების პროცესში, ნაქურდალი ოქროს ნივთები ამოღებული იქნა მერაბ ლაშქარეიშვილის მშობლების საცხოვრებელი სახლის ეზოდან, ასევე ოქრომჭედლისგან, რომელმაც აღნიშნული ნივთები შეიძინა ვახტანგ ფურცელაძისგან და საქმეზე მოწმის სტატუსის მქონე რამდენიმე პირისგან, ვახტანგ ფურცელაძის პირადი ჩხრეკისას ასევე ამოღებული იქნა ნარკოტიკული საშუალება ჰეროინი.

აღნიშნული დანაშაულისთვის ბრალდებული იყო ასევე გიორგი ხარატიშვილი, მაგრამ საქმის არსებითი განხილვისას ბარლდების მხარემ უარი თქვა გიორგი ხარატიშვილის ბრალდებაზე, რის საფუძველზეც სასამართლოს განჩინებით შეწყდა აღნიშნული პირის მიმართ სისხლისსამართლებრივი დევნა.

სასამართლო სხდომაზე ბრალდებულებმა თავი არ ცნეს დამნაშავედ წარდგენილ ბრალდებაში, თუმცა მათ მიერ დანაშაულის ჩადენის ფაქტი დადასტურებული იქნა საქმის არსებითი განხილვისას გამოკვლეული მტკიცებულებებით: დაზარალებულისა და მოწმეთა ჩვენებებით, ამოცნობის ოქმებით, ამოღებული ნივთიერი მტკიცებულებებით , რაც ამოცნობილ იქნა დაზარალებულის მიერ და ამოღებულ ნივთებზე ჩატარებული სასაქონლო ექსპერტიზით, ასევე საზღვრის კვეთის დამადასტურებელი დოკუმენტაციით და თურქეთის მხარის მიერ გადმოცემული გამოძიების მასალებით.