ტურიზმის ეროვნული ადმინისტრაცია, შსს-ს საინფორმაციო-ანალიტიკური დეპარტამენტის საინფორმაციო ცენტრის მიერ მოწოდებულ ციფრებზე დაყრდნობით, 2012 წლის 11 თვის სტატისტიკურ მონაცემებს აქვეყნებს. 2012 წლის 11 თვეში (იანვარი-ნოემბერი) საქართველოს სულ 4 017 375 უცხოელი მოგზაური ესტუმრა, რაც წინა წლის ანალოგიურ მაჩვენებელს 58%-ით აღემატება.
ადმინისტრაციის ინფორმაციით, 2012 წლის ნოემბრში საქართველოში ჩამოსულ უცხოელთა რაოდენობამ 369 101 შეადგინა, რაც გასული წლის იმავე პერიოდში ჩამოსულთა ციფრზე 68%-ით მეტია.
ადმინისტრაციაში განმარტავენ, რომ სტაბილურად იმატებს უცხოელი ვიზიტორების რაოდენობა მეზობელი ქვეყნებიდან. 11 თვის მონაცემებით ლიდერობენ შემდეგი ქვეყნები: თურქეთი, აზერბაიჯანი, სომხეთი, რუსეთი და ირანი.
მათივე ინფორმაციით, მონაცემების გაანგარიშება ხდება მსოფლიო ტურიზმის ორგანიზაციის საერთაშორისო რეკომენდაციების მიხედვით ტურიზმის სტატისტიკის შესახებ.
