დიალოგის გზები უნდა მოიძებნოს, იმიტომ, რომ აფხაზეთში და ე.წ. სამხრეთ ოსეთში არსებული სამხედრო ბაზები - ეს არის დამოკლეს მახვილი საქართველოს სახელმწიფოებრიობაზე, - ეს განცხადება დღეს ექსპერტმა კავკასიის საკითხებში მამუკა არეშიძემ თბილისში გამართულ პრესკონფერენციაზე რუსეთის პრემიერ-მინისტრის დიმიტრი მედვედევის მიერ გაკეთებული განცხადების კომენტირებისას გააკეთა.
"საქართველოს წინა ხელისუფლებას რომ ეღიარებინა დამოუკიდებლოიბა აფხაზეთისა და სამხრეთ ოსეთის, მაშინაც იქნებოდა თანახმა რუსეთის ხელისუფლება დიალოგზე მიუხედავად იმისა, რომ მედვედევი ამავე განცხადებაშივე ამბობს, რომ ჩვენ არ ვიყავით მომხრე სააკაშვილთან ლაპარაკის, თორემ ნებისმიერს დაველაპარაკებოდითო",_ აცხადებს მამუკა არეშიძე.
მისივე თქმით, არც წინა და არც დღევანდელი ხელისუფლება ამ აღიარების მომხრე არ არის.
"აქედან გამომდინარე, ორივე მხარეს მოგვიწევს სხვა მიმართულებებით ძებნა გზებისა, როგორ შეიძლება დიალოგის ფორმატი რომ შედგეს. და ის რომ დიალოგის გარკვეული ფორმატი უნდა შედგეს ამას ვამბობდი წინა ხელისუფლების დროსაც და იმის წინა ხელისუფლების დროსაც.
ოღონდ მე მქონდა ყოველთვის აქცენტი იმაზე გაკეთებული, რომ ეს ყოფილიყო საქართველოს ინტერესებიდან გამომდინარე და არა მხოლოდ კულუარული დიალოგი, რომელსაც ეკონომიკური დივიდენდები მოჰქონდა მავანისათვის, როგორც წინა, ისე იმის წინა ხელისუფლებაში და ეს უნდა ყოფილიყო საქმიანი და მომავალზე ორიენტირებული დიალოგი.
ასე რომ გაგვიჭირდება, მაგრამ უნდა მოვძებნოთ გზები, იმიტომ, რომ აფხაზეთში და ე.წ. სამხრეთ ოსეთში არსებული სამხედრო ბაზები ეს არის დამოკლეს მახვილი საქართველოს სახელმწიფოებრიობაზე", _ აცხადებს არეშიძე და აღნიშნავს, რომ აფხაზეთისა და ე.წ. სამხრეთ ოსეთის დამოუკიდებლობის აღიარებასთან დაკავშირებით ახალ ხელისუფლებას ზუსტად იგივე პოზიცია უჭირავს როგორც წინა ხელისუფლებას.
"მე შემიძლია გითხრათ, რომ ვისთანაც რა დონეზე მქონია საუბარი, ეს იქნებოდა პრემიერი, ეს იქნებოდა საგარეო საქმეთა მინისტრი, ეს იქნებოდა მინისტრი რეინტეგრაციის საკითხებში, ეს იქნებოდა პარლამენტის ტერიტორიული მთალიანობის აღდგენის კომისიის ახალი თავმჯდომარე - ყველასგან მხოლოდ ასეთი შეფასება მომისმენია ამ ფაქტის, რომ - საქართველოსთვის ეს ტერიტორიები არის დროებით ოკუპირებული და მთი დაბრუნებისაკენ გადაიდგმება სერიოზული ნაბიჯები", - ამბობს მამუკა არეშიძე.