დღეს, 16 ნოემბერს, 11:00 საათზე, ივ. ჯავახიშვილის სახელობის თბილისის სახელმწიფო უნივერსიტეტში გაიხსნება აკადემიკოს მარიამ ლორთქიფანიძის დაბადებიდან 90 წლის იუბილესადმი მიძღვნილი საერთაშორისო სამეცნიერო კონფერენცია "ისტორიული რეპრეზენტაცია: თეორიული მიმართულებანი და კონკრეტული კვლევები".
კონფერენციაზე ორი სექცია იმუშავებს, რომელზედაც ქართველი და მსოფლიოს სხვადასხვა უნივერსიტეტის მეცნიერები წაიკითხავენ მოხსენებებს. ღონისძიების ფარგლებში პირველი კორპუსის ფოიეში გაიმართება მარიამ ლორთქიფანიძის ცხოვრებისა და მოღვაწეობის ამსახველი ფოტოგამოფენა.
აკადემიკოსი მარიამ ლორთქიფანიძე თსუ ბიბლიოთეკას საჩუქრად გადასცემს პირად ბიბლიოთეკას (4500-მდე წიგნი) და შალვა მაყაშვილის ფერწერულ ტილოს.
კონფერენცია 17 ნოემბრამდე გასტანს.
