„მე უკიდურესად შეწუხებული ვარ არჩევნების შემდეგ განვითარებული მოვლენებით, რომელიც საქართველოში პოლიტიკური ოპონენტების დაკავებას უკავშირდება", - განაცხადა ნატო-ს გენერალურმა მდივანმა ანდერს ფოგ რასმუსენმა პრაღაში, ნატო-ს საპარლამენტო ასამბლეის სხდომაზე.
სააგენტო „როიტერის" ცნობით, რასმუსენმა საქართველოს მთავრობას მოუწოდა, რომ სასამართლო პროცესები პოლიტიკური ჩარევისგან თავისუფალი იყოს. „ამ საკითხების გადაწყვეტა სასამართლო სისტემის პრეროგატივაა, მაგრამ ცხადია, მნიშვნელოვანია, რომ ასეთი საქმეები პოლიტიკური ჩარევის გარეშე განიხილებოდეს. ჩვენ განსაკუთრებული ყურადღებით დავაკვირდებით მოვლენების განვითარებას ამ მიმართულებით", - აღნიშნა რასმუსენმა.
შეგახსენებთ, საქართველოს პრეზიდენტსა და ნატო-ს გენერალურ მდივანს შორის ორმხრივი შეხვედრა მიმდინარეობს, რომელიც პრაღაში ალიანსის საპარლამენტო ასამბლეის 58-ე სესიის ფარგლებში იმართება. პრეზიდენტის ადმინისტრაციის ინფორმაციით, მიხეილ სააკაშვილი ყოველწლიურ სესიას ანდერს ფოგ რასმუსენის პირადი მიწვევით ესწრება.
14 ნოემბერს დაგეგმილია საქართველოს პრემიერ-მინისტრის ბიძინა ივანიშვილის შეხვედრა ნატოს გენერალურ მდივანთან.
