ზოგიერთმა მედიასაშუალებამ არასწორად გაავრცელა ინფორმაცია იძულებით გადაადგილებულ პირთა ყოველთვიურ 28-ლარიან შემწეობასთან დაკავშირებით. კერძოდ, გავრცელებული ინფორმაციის მიხედვით, თითქოს სამინისტრო აპირებს დევნილთათვის 28-ლარიანი შემწეობის მოხსნას. აღნიშნული ინფორმაცია სიმართლეს არ შეესაბამება. დევნილი საზოგადოება შეცდომაშია შეყვანილი. მედიასაშუალებებს ვთხოვთ, საზოგადოებას ზუსტი ინფორმაცია მიაწოდონ.
რაც შეეხება რეალობას, რომელიც მინისტრმა დავით დარახველიძემ გააჟღერა, შემდეგია: მინისტრის მისაზრებაა, რომ იმ წარმატებულ იძულებით გადაადგილებულ პირებს, რომელთაც გააჩნით სოლიდური შემოსავალი ან არიან მაღალი თანამდებობის პირები, როგორიცაა თავად მინისტრი და მისი მოადგილე, რომელთათვისაც აუცილებელ საჭიროებას არ წარმოადგენს აღნიშნული დახმარება, უმჯობესი ხომ არ იქნება, მოეხსნათ შემწეობა და ამ გამოთავისუფლებული თანხის ხარჯზე საარსებო მინიმუმამდე გაეზარდოთ იმ დევნილებს, რომლებიც შეჭირვებულად ცხოვრობენ და შემწეობა მათთვის ერთადერთი შემოსავლის წყაროა.
აღნიშნული წარმოადგენს მხოლოდ მოსაზრებას და არა კონკრეტულ გეგმას და გადაწყვეტილებას. საკითხი დევნილ საზოგადოებასთან კონსულტაციის გარეშე არც განიხილება და არც ცვლილება იგეგმება.
მედიასაშუალებებს კიდევ ერთხელ ვთხოვთ, ნუ შეიყვანენ მოსახლეობას შეცდომაში და ნუ გაავრცელებენ მცდარ ინფორმაციას.
