საქართველოსა და საფრანგეთს შორის თანამშრომლობის საკითხები განიხილეს დღეს საქართველოს ფინანსთა სამინისტროში გამართულ ერთობლივ შეხვედრაზე, რომელსაც ფინანსთა მინისტრი ნოდარ ხადური, მინისტრის მოადგილეები: გიორგი თაბუაშვილი და დავით ლეჟავა. ასევე, ეკონომიკისა და მდგრადი განვითარების მინისტრი გიორგი კვირიკაშვილი და მინისტრის პირველი მოადგილე დიმიტრი ქუმსიშვილი დაესწრნენ.
ფრანგულ მხარეს წარმოადგენდნენ საფრანგეთის ელჩი საქართველოში რენო სალენსი, ელჩის მოადგილე ჰავიერ რაურდი, ეკონომიკური ატაშე დანიელ პატატი, ასევე საფრანგეთის განვითარების სააგანტოს (AFD) წარმომადგენლები.
მხარეებმა იმსჯელეს იმ პროექტებზე, რომელიც საფრანგეთის მხარდაჭერით ამჟამად მიმდინარეობს საქართველოში. მათი ინტერესის საგანია ინფრასტრუქტურა, ტურიზმისა და ავიაციის სექტორები.
„ჩვენთვის ძალიან მნიშვნელოვანია ევროკავშირთან და განსაკუთრებით, მის ლიდერ ქვეყნებთან ურთიერთობა. საფრანგეთი ჩვენი ერთ-ერთი მნიშვნელოვანი პარტნიორია. ის პროექტები, რომელიც საქართველოში საფრანგეთის მხარდაჭერით ხორციელდება, ცხადია, რომ გაგრძელდება. ჩვენთვის ასევე მნიშვნელოვანია, რომ ეს თანამშრომლობა თვისობრივად უფრო ახალ, მაღალ დონეზე იყოს აყვანილი. საუბარი შეეხებო იმ პროექტებს, რაც აქამდე განხორციელდა. ვისაუბრეთ სამომავლო პროექტების პერსპექტივებზე," - განაცხადა ფინანსთა მინისტრმა ნოდარ ხადურმა.
როგორც ეკონომიკისა და მდგრადი განვითარების მინისტრმა გიორგი კვირიკაშვილმა განაცხადა, ამჟამად, მიმდინარეობს ყველა იმ დაწყებული პროექტის განხილვა, რომელსაც ფრანგული მხარე საქართველოს მთავრობასთან ერთად აფინანსებს. „საუბარია, ქუთაისის აეროპორტის თემაზე, სვანეთის სათხილამურო-საბაგირო გზებზე, თბილისისა და საქალაქთაშორისო ტრანსპორტირების სისტემებზე. ძალიან ბევრი სამუშაოა ჩასატარებული იმისთვის, რათა შედგეს ყველა ამ პროექტის ანალიზი," - განაცხადა გიორგი კვირიკაშვილმა.
საქართველოში საფრანგეთის ელჩის რენო სალენსის თქმით, შეხვედრაზე ფრანგული მხარე დაინტერესდა საქართველოს ეკონომიკისა, ზოგადად, ქვეყნის განვითარებისა და ახალი მთავრობის პრიორიტეტებით. „მოხარული ვართ გაგრძელდეს პარტნიორობა ჩვენს ქვეყნებს შორის და გამოიკვეთოს თანამშრომლობის ახალი სფეროები," - განაცხადა საფრანგეთის ელჩმა
