"სერთიფიცირებული პედაგოგების სახელფასო დანამტების გაცემასთან დაკავშირებით საქართველოს საჯარო სკოლებში შექმნილია გაურკვეველი და საგანგაშო სიტუაცია. მათი უმრავლესობა ვერ იღებს დაპირებულ დანამატს. ამის მიზეზად მიგვაჩნია, როგორც საქართველოს განათლებისა და მეცნიერების მინისტრის 576-ე ბრძანება, ისე ცალკეულ ხელმძღვანელ პირთა კანონშეუსაბამო დამატებითი ინსტრუქციების გაცემა. 2005 წელს 576-ე ბრძანება, რომლითაც განისაზღვრება საჯარო სკოლების მასწავლებელთა შრომის ანაზღაურების ოდენობა და პირობები, კაბალურ, დამცირებულ და შეურაცყოფილ მდგომარეობაში აგდებდა პედაგოგებს, რაც კიდევ უფრო გაამწვავა მასში შემდგომ წლებში შეტანილმა ცვლილებებმა. 2011 წელს შეტანილი ცვლილება (მუხლი 5) შეეხო სერთიფიცირებული მასწავლებლისთვის დანამატის მიცემის წესსაც. რომლის მიხედვითაც ყოველთვიურ დანამატს მიიღებდა მხოლოდ ის სერთიფიცირებული მასწავლებელი, რომელსაც არა ქვს 18 (სრულ) კვირეულ გაკვეთილზე ნაკლები დატვირთვა. თუმცა, თუ სკოლაში სრული დატვირთვა ვერ ხერხდება, დანამატი მაინც უნარჩუნდებოდა.

ისედაც კაბალური და უკანაონო ბრძანებით შექმნილი პრობლემა კიდევ უფრო დაამძიმა რამდენიმე დღის წინ საგანმანათლებლო რესურს ცენტრებიდან სკოლების ადმინისტრაციებისთვის ელექტრონული ფოსტით დაგზავნილმა სრულიად კანონსაწინააღმდეგო (576-ე ბრძანებასთანაც კი წინააღმდეგობაშია) მითითება-ინსტრუქციამ, რომლითაც დირექტორებს დაევალათ, რომ დანამატი არ გასცენ იმ სერთიფიცირებულ პედაგოგებზე, რომელთაც სრული (18 სთ) დატვირთვა აქვთ, მაგრამ არა კონკრეტულ კლასებში. მაგალითად ისტორიის მასწავლებელი მხოლოდ და მხოლოდ იმ შემთხვევაში მიიღებს დანამატს, თუ ის სრულადაა დატვირთული VII-XII კლასებში, ხოლო დანარჩენ კლასებში დატვირთვისას მას დანამატზე დამშვიდობება მოუწევს.

რესუსრს ცენტრებიდან გაცემულ ინსტრუქციას არ ჰყავს კონკრეტული ავტორი და არ წარმოადგენს იურიდიული სახის დოკუმენტს. ამის მიუხედავად სკოლების ადმინისტრაციები გადავიდნენ მის შესრულებაზე, რამაც სერთიფიცირებული პედაგოგების უდიდესი უმრავლესობის უკმაყოფილება გამოიწვია.

ჩვენ, პედაგოგები, ვფიქრობთ, რომ ამ უკანონობის უკან დგანან გარკვეული პოლიტიკური ძალები. ისინი ცდილობენ პედაგოგებში ანტისამთავრობო უკმაყოფილების გავრცელებით თავიანთი კონკრეტული მიზნების მიღწევას. ვითვალისწინებთ ამ საფრთხეს და ვთხოვთ ხელისუფლებას, კერძოდ კი საქართველოს განათლებისა და მეცნიერების სამინისტროს: 1. გადახედონ ზემოხსენებული 576-ე ბრძანების მართებულობას და მასში შესაბამისი ცვლილებების შეტანით მაქსიმალურად ეცადონ არ დაუშვან პედაგოგთა ინტერესების მორიგი შელახვა; 2. პედაგოგთა შემდგომი სახელფასო ანაზღაურების მატებისას გაითვალისწინონ ჩვენი მოსაზრებები; 3. უახლოეს დღეებში საქართველოს განათლებისა და მეცნიერების მინისტრმა ბატონმა გიორგი მარგველაშვილმა გამონახოს ჩვენთან შეხვედრის დრო.

საინიციატივო ჯგუფი სახელით, დავით ფერაძე, 116-ე საჯარო სკოლის პედაგოგი (ტელეფონი: 555 27 05 38)".