ივ. ჯავახიშვილის სახელობის თბილისის სახელმწიფო უნივერსიტეტში ლივიო ძერბინის, გელა გამყრელიძის, თემურ თოდუს წიგნის "რომაელები ოქროს საწმისის ქვეყანაში" პრეზენტაცია გაიმართა. ღონისძიებას თსუ რექტორი ალექსანდრე კვიტაშვილი, იტალიის ელჩი საქართველოში ფედერიკა ფავი, საელჩოსა და თსუ-ის წარმომადგენლები და სტუდენტები დაესწრნენ.
კვიტაშვილის განცხადებით, წარმოდგენილი წიგნი კიდევ ერთი დასტურია იმისა, რომ საუკუნეების განმავლობაში საქართველო ღირებულებებისა და ფასეულობების მხრივ ევროპის განუყოფელი ნაწილი იყო.
"თსუ-ს იტალიის რამდენიმე უნივერსიტეტთან აქვს ურთიერთობა; მათ შორის, სამეცნიერო კავშირები. რამდენიმე თვის წინ ვატიკანის არქივის გახსნისას საკმაოდ ბევრი და საინტერესო დოკუმენტი აღმოჩნდა, რომელიც შუა საუკუნეებში საქართველოს რომთან და ვატიკანთან ურთიერთობას ასახავს. ამ დოკუმენტების შესწავლა საკმაოდ ბევრ ახალ ინფორმაციას მოგვაწვდის", - განაცხადა მან.
საქართველოს ევროპული არჩევნის ჩამოყალიბებაში რომისა და ქართული სამეფოების ურთიერთობაზე ისაუბრა იტალიის ელჩმა საქრთველოში ფედერიკა ფავიმ.
"წიგნი მნიშვნელოვანია იმ კუთხით, რომ მასში ნათლადაა აღწერილი, თუ როგორი იყო სამხრეთ კავკასიის სამეფოების როლი რომის იმპერიაში. რომისთვის ეს ტერიტორია დასაყრდენი იყო, რადგან ეს სამეფოები იცავდნენ მცირე აზიას ჩრდილოკავკასიელ მომთაბარეთა შემოსევისგან. ტრადიციებმა და კულტურული მემკვიდრეობის კავშირებმა გაუძლო დროს. დღეს ეს უფრო ძლიერად ჩანს, რადგან საქართველო ევროინტეგრაციისკენ მიისწრაფვის", - აღნიშნა ელჩმა.
"რომაელები ოქროს საწმისის ქვეყანაში" იტალიურ ენაზეა და ეძღვნება საქართველო-რომის იმპერიის მრავალსაუკუნოვან (ძვ.წ. I- ახ.წ. IV სს.) ურთიერთობათა პერიპეტიებს. მონოგრაფიაში განხილულია რომის სამხედრო-პოლიტიკური ექსპანსია საქართველოში; კოლხეთ-იბერიის როლი რომის იმპერიის გეოპოლიტიკურ სივრცეში, რომაული სამყაროს სხვადასხვა ცენტრთან კოლხეთ-იბერიის სავაჭრო ეკონომიკური კონტაქტები. ნაშრომში გაშუქებულია ასევე "რომანიზაციის" პროცესები საქართველოში.
