„საქართველოს ინდუსტრიული ჯგუფი" განცხადებას ავრცელებს, რომელსაც გთავაზობთ უცვლელად:
"როგორც მოგეხსენებათ, ბოლო დროს გახშირდა ქვეყნის სხვადასხვა საწარმოში გაფიცვების ფაქტები, რამაც პერიოდული ხასიათი შეიძინა. ასეთ ნეგატიურ ფონზე უკანასკნელი ორი დღის განმავლობაში „საქნახშირი - ჯი-აი-ჯი ჯგუფის" კუთვნილ ტყიბულის მაღაროებში დასაქმებული პერსონალის მხრიდან შეინიშნება მასობრივი გაფიცვის და საკუთარი მოვალეობის შესრულებისაგან თავის არიდების მცდელობა.
მიუხედავად მენეჯმენტის მიერ მიერ ტყიბულის ქვანახშირის საწარმოს მუშა-მოსამსახურეთა სოციალური და მატერიალური მდგომარეობის გასაუმჯობესებლად გატარებული მრავალი ღონისძიეისა, ადგილი აქვს ზოგიერთი თანამშრომლის მხრიდან უმართავი პროცესების პროვოცირების მცდელობას, რაც საბოლოოდ საწარმოს გაჩერების საფრთხეს შეიცავს და საბოტაჟის ფორმას იძენს.
იმის გათვალისწინებით, რომ ნახშირის მოპოვების პროცესი ზოგადად დაკავშირებულია მომატებულ საფრთხესთან, ხოლო მისი უხეში დარღვევა და ჩაშლა ასეთ საფრთხეს განუზომლად ზრდის, გამოვთქვამთ ჩვენს შეშფოთებას მსგავსი დესტრუქციული ქმედებების გამო. საბოტაჟის და უმართავი პროცესების თავიდან აცილების მიზნით, მზად ვართ და მოვუწოდებთ ყველას, ნებისმიერი სადაო საკითხების გადაწყვეტა მოხდეს კონსტრუქციულ სამუშაო ვითარებაში და არა გაუმართლებელი აქციების პროვოცირებით".
