დღეს, 6 ნოემბერს, 12:00 საათზე, საქართველოს ადვოკატთა ასოციაციის ოფისში გორის ბაზრის ყოფილი მფლობელი ჯემალ წიკლაური და მისი ადვოკატი ვახტანგ დვალიშვილი პრესკონფერენციას გამართავენ. წიკლაური ქონების უკან დაბრუნებას ითხოვს. ბაზრის ყოფილი მფლობელი მოუწოდებს ბაზრის ამჟამინდელ მფლობელს - შპს "სავაჭრო ცენტრს" - ნებაყოფილობით დაუბრუნოს ის ქონება, რომელიც მას 2004 წელს წაართვეს.
წიკლაური გორის ბაზარს 1996 წლიდან ფლობდა, 2004 წელს გადასახადების დამალვის ბრალდებით დააპატიმრეს. წიკლაურის თქმით, პატიმრობაში ყოფნისას ყოფილი გუბერნატორი მიხეილ ქარელი და იმჟამინდელი შიდა ქართლის საოლქო პროკურორი აკაკი ტერაშვილი მას გორის საკოლმეურნეო ბაზრის სახელმწიფოსთვის ჩუქებას სთხოვდნენ. 4-თვიანი პატიმრობის შემდეგ წიკლაურმა ქონების სახელმწიფოსთვის ჩუქების ნოტარიულ აქტს ციხეში მოაწერა ხელი. პრესკონფერენციაზე წიკლაური მასმედიას მოუთხრობს მის მიმართ განხორციელებულ ძალადობაზე.
