დღეს, 3 ნოემბერს, ივ. ჯავახიშვილის სახელობის თბილისის სახელმწიფო უნივერსიტეტში ამერიკული წიგნის კლუბის პრეზენტაცია გაიმართა. ღონისძიებას თსუ რექტორი ალექსანდრე კვიტაშვილი, ტენესის ბიბლიოთეკის მეგობართა ჯგუფის წევრები სტეფენ მოსლი, სტივ ჰილისი, რუსეთში ამერიკული წიგნის კლუბის დამფუძნებელი ოლგა მეშევეკოვა და თსუ წარმომადგენლები ესწრებოდნენ.
ამერიკული წიგნის კლუბი ქართულ-ამერიკული პროექტია, რომელსაც საფუძველი გასულ წელს ჩაეყარა. ამერიკული ბიბლიოთეკის მეგობართა ჯგუფმა ტენესის შტატში შეგროვებული 40 ათასამდე წიგნი საზოგადოებრივ ორგანიზაციას „სამოქალაქო განათლებისა და სოციალური თანასწორობის ცენტრს" გამოუგზავნა. ამერიკული წიგნის კლუბში ყველა მიმდინარეობისა და ასაკისთვის საინტერესო წიგნია თავმოყრილი.
ტენესის ბიბლიოთეკის მეგობართა ჯგუფის წევრის სტივ ჰილსის განცხადებით, „წიგნები ერთი წლის განმავლობაში გროვდებოდა ტენესის შტატში და პროექტის მიზანი საგანმანათლებლო სფეროში ქართველებისთვის ამერიკული გამოცდილების გაზიარება იყო."
თსუ რექტორმა ალექსანდრე კვიტაშვილმა აღნიშნა, რომ „ტენესის ბიბლიოთეკის მიერ გადმოცემული მასალა ძალიან მდიდარია. ის მოიცავს, როგორც მხატვრულ ლიტერატურას, ასევე აკადემიური ტიპის პროფესიულ წიგნებსა და ენციკლოპედიებს".
ამერიკული წიგნის კლუბის ერთ-ერთი დამფუძნებლის მარი ნარჩემაშვილის თქმით, „ამერიკელმა ხალხმა კიდევ ერთხელ აჩვენა თავისი კეთილგანწყობა ქართველების მიმართ. ეს არის სახალხო დიპლომატიის ერთ-ერთი საუკეთესო ნიმუში. ბიბლიოთეკით ძალიან ბევრი ადამიანი ისარგებლებს და ამერიკულ კულტურას გაეცნობა".
ამერიკული წიგნის კლუბი „სამოქალაქო განათლებისა და სოციალური თანასწორობის ცენტრის" თსუ ამერიკის სწავლების ცენტრთან თანამშრომლობის საფუძველზე გაიხსნა. წიგნებით სარგებლობის უფლება თსუ სტუდენტებთან ერთად, ნებისმიერ დაინტერესებულ პირს ექნება.
ტენესის ბიბლიოთეკის მეგობართა ჯგუფის წევრები სტეფენ მოსლი და სტივ ჰილისი საქართველოს 2 ნოემბერს ეწვივნენ და მათი ვიზიტი 7 ნოემბრამდე გაგრძელდება.