ტელეკომპანია I სტერეო განცახდებას ავრცელებს, რომელსაც "ჯი-ეიჩ-ენი" გთავაზობთ უცვლელად:
"ბოლო პერიოდში, ტელეკომპანია I სტერეოს დამფუძნებლის (65%-ის მფლობელის) მისამართით, ყოფილი დირექტორის და პარტნიორის, დავით ზილფიმიანის მხრიდან ზოგიერთ მედია-საშუალებაში სხვადასხვა სახის ბრალდებები ისმის.
გაცნობებთ, რომ 2006 წლიდან, ტელეკომპანიის 65%-იან წილს ფლობს ერთ-ერთი პარტნიორი, რომელმაც თავის დროზე სრული ნდობა გამოუცხადა დავით ზილფიმიანს და ეს უკანასკნელი 6 წლის განმავლობაში მართავდა კომპანიას. მიმდინარე წლის მაისში, საკონტროლო პაკეტის მფლობელმა პარტნიორმა მოიწვია აუდიტორული შემოწმება კომპანიის ფინანსური ზარალის დასათვლელად, რომელიც I სტერეოს, დავით ზიფიმიანის დირექტორობის პერიოდში მიადგა. ზარალი საკმაოდ სოლიდური აღმოჩნდა და ზილფიმიანი გათავისუფლდა დირექტორის პოზიციიდან. ამჟამად მიმდინარეობს სასამართლო პროცესი, ზარალის დაფარვის მიზნით. აქვე აღსანიშნავია ის, რომ დავით ზილფიმიანმა, I სტერეოს მართვის პერიოდში, პარალელურად ჩამოაყალიბა კომპანია "სტერეო+" და დაიწყო ფინანსური რესურსებისა და აქტივების გადატანა I სტერეოდან თავის კუთვნილ კომპანიაში. შესაბამისად ხდებოდა ისედაც ფინანსურ პრობლემებში მყოფი I სტერეოს მდგომარეობის გაუარესება.
ბოლო პერიოდში, ასევე ადგილი ჰქონდა ტელეკომპანიის შენობიდან სხვადასხვა აპარატურის გაუჩინარებას, რის გამოც I სტერეოს მენეჯმენტი იძულებული გახდა დაცვის სამსახურთან ერთად მიეღო შესაბამისი ზომები მატერიალური აქტივების დასაცავად. ამ საკითხზე მიმდინარეობს გამოძიება, საქმეში ჩართულია კრიმინალური პოლიცია.
გვინდა განვაცხადოთ, რომ ყველა ზემოთ ჩამოთვლილი ფაქტი, დავით ზილფიმიანის მიერ არასწორედ მიეწოდება საზოგადოებას. ადგილი აქვს დეზინფორმაციას და საზოგადოების შეცდომაში შეყვანას. ასევე გაცნობებთ, რომ 65%-ის მფლობელ პარტნიორსა და ყოფილ დირექტორს შორის მიმდინარე სასამართლო პროცესის (საქმე გადაგზავნილია სააპელაციო სასამართლოში) დასრულებისთანავე, საზოგადოებას მივაწვდით დეტალურ ინფორმაციას".