გაზეთი "ჯორჯიან თაიმსს" მუშაობას უახლოეს მომავალში გააგრძელებს, - ამის შესახებ ჰოლდინგ "ჯორჯიან თაიმსის" დამფუძნებელმა მალხაზ გულაშვილმა განაცხადა, რომელმაც დღეს საპატიმრო დატოვა. მისი თქმით, დღეს არა მარტო მალხაზ გულაშვილი, არამედ თავად გაზეთი და ჰოლდინგი "ჯორჯიან თაიმსი" გათავისუფლდა.
მალხაზ გულაშვილი ქართველმა სამართალდამცველებმა 2011 წლის 25 ოქტომბერს საქართველო-აზერბაიჯანის სასაზღვრო გამშვები პუნქტის ტერიტორიაზე დააკავეს. ის ტელეკომპანია "კავკასიის" სტუდიაში მომხდარი ინციდენტისა და საზღვრის უკანონო გადაკვეთის ბრალდებით იძებნებოდა. მასთან ერთად, საზღვრის უკანონო გადაკვეთის ბრალდებით, დააკავეს ასევე ძებნილი დავით გულაშვილი.
2010 წლის 7 ივნისს, ტელეკომპანია "კავკასიის" ერთ-ერთ გადაცემაში, რომელშიც ჰოლდინგ "ჯორჯიან თაიმსის" დამფუძნებელი მალხაზ გულაშვილიც მონაწილეობდა, ერეკლე დეისაძის წიგნის, "საიდუმლო სირობის" განხილვა ჩხუბში გადაიზარდა. ამის შემდეგ პოლიციამ რამდენიმე ადამიანი დააკავა.
