კახეთის საინფორმაციო ცენტრის ინფორმაციით, პროკურატურა ახმედ ჩატაევს სსკ-ის 236-ე მუხლის I და II ნაწილებით გათვალისწინებული დანაშაულის ჩადენაში ადანაშაულებს, რაც ასაფეთქებელი მოწყობილობების მართლსაწინააღმდეგო შეძენა, შენახვა, ტარებას გულისხმობს და სამიდან ხუთ წლამდე თავისუფლების აღკვეთას ითვალისწინებს. სისხლის სამართლის საქმეში შსს-ს 3 მოწმე ჰყავს, მესაზღვრეები გიორგი კერესელიძე, ბადრი ტყელამაძე, გოგი აივაზაშვილი. სამივე ლაფანყურის სასაზღვრო სექტორის თანამშრომელია. კერესელიძემ და ტყემალაძემ კახეთის საინფორმაციო ცენტრთან საუბარში არ დაადასტურეს, რომ ჩატაევი შეიარაღებული იყო. კერესელიძის თქმით, მას ჩვენებაზე ხელი კუდ-ში მოაწერინეს. ჩატაევს ამჟამად წინასწარი პატიმრობა აქვს შეფარდებული და ციხის საავადმყოფოშია მოთავსებული. მას დამოუკიდებლად გადაადგილება უჭირს.
ახმედ ჩატაევის განცხადებით, 28 აგვისტოს, ის თბილისიდან ლოპოტას ხეობაში საქართველოს შს სამინისტროს ანტიტერორისტული ცენტრის ხელმძღვანელობის თხოვნით ჩავიდა. შს სამინისტროს მაღალჩინოსნებმა მას ლოპოტას ხეობაში მყოფ შეიარაღებულ ჩეჩნებთან და ქისტებთან მოლაპარაკებაში ჩართვა სთხოვეს. საქართველოს ხელისუფლება ითხოვდა, შეიარაღებულ ჯგუფს, რომელიც საქართველოდან დაღესტნის გავლით ჩეჩნეთში გადასვლას აპირებდა, იარაღი დაეყარა და სამართალდამცავებს ჩაბარებოდნენ. ჩატაევი ხეობის სიღრმეში მოლაპარაკებაზე შევიდა და იქიდან გამოსვლის შემდეგ ანტიტერორისტული ცენტრის ხელმძღვანელებს, რომლებსაც კარგად იცნობდა, უთხრა, რომ ჯგუფის წევრები იარაღის დაყრაზე უარს ამბობდნენ, თუმცა იმ შემთხვევაში, თუ სპეცრაზმი ლოპოტას ხეობას დატოვებდა, ისინი ისევ პანკისის ხეობაში დაბრუნდებოდნენ. ანტიტერორისტული ცენტრის ხელმძღვანელმა ჩატაევს რამდენიმე წუთი დრო სთხოვა. ჩატაევი ვარაუდობს, რომ სავარაუდოდ შს მინისტრთან, ბაჩო ახალაიასთან უნდა შეეთანხმებინათ მის მიერ მიწოდებული პირობა. დაახლოებით 15 წუთის შემდეგ, როცა ჩატაევი პასუხს ელოდებოდა, ის სნაიპერმა ფეხში დაჭრა. ჩატაევმა მიმალვა შეძლო, რამდენიმე წუთში კი საბრძოლო მოქმედებები დაიწყო, რომელიც დაახლოებით 2-3 საათს გაგრძელდა. შსს-ს სპეცოპერაციის შედეგად დაიღუპა 2 სპეცრაზმელი, 1 სამხედრო ექიმი და შეიარაღებული ჯგუფის 7 წევრი. არსებული ინფორმაციით, ჯგუფის 17 წევრიდან 10 ადამიანი ცოცხალი გადარჩა. ჩატაევი ლოპოტას ხეობაში 10 დღის განმავლობაში დარჩა. ამ ხნის განმავლობაში მას ჭრილობა გაურთულდა და სიარული ვეღარ შეძლო. ჯოხზე დაყრდნობილი ის გზაზე გამოვიდა და მესაზღვრეებს ანიშნა, რომ მარტო იყო, უიარაღოდ. მესაზღვრეებმა, რომლებიც მას გზაზე შეხვდნენ, ჩატაევს პირველადი დახმარება გაუწიეს, ჭრილობა შეუხვიეს და ხელმძღვანელობას აცნობეს. ამის შემდეგ ჩატაევი ჯერ თბილისში, იქიდან კი გორში გადაიყვანეს სამხედრო ჰოსპიტალში, სადაც მას მარცხენა ფეხი მოკვეთეს. ჩატაევს არც მარჯვენა ხელი აქვს, ამბობს, რომ ჩეჩნეთში ომის დროს დაკარგა.
ჩატაევის ინტერესებს არასამთავრობო ორგანიზაცია ადამიანის უფლებათა ცენტრის ადვოკატი ნინო ანდრიაშვილი იცავს. ჩატაევის საქმეზე წინასასამართლო სხდომა თბილისის საქალაქო სასამართლოში ორშაბათს, 29 ოქტომბერს, 14:00 საათზეა დანიშნული.