ტელეკომპანია "მე-9 არხი" განათლების სამინისტროში დიმიტრი შაშკინის მინისტრობის დროინდელი კორუფციული გარიგების შესახებ საუბრობს. საქმეში ფიგურირებს მინისტრის მოადგილე კოკა სეფერთელაძე და მინისტრის თანაშემწე ვინმე ფელიქს უბირია, რომელიც შაშკინის სახელით საუბრობს. საქმეში ასევე გარეულია კონსტიტუციური უსაფრთხოების დეპარტამენტი.
სქემა ასეთი იყო: განათლების სამინისტროში დაბარებულ ბიზნესმენებს სახელმძღვანელოების შემოტანის ახალი ლიცენზიის მისაღებად ქრთამს თხოვდნენ, შემდეგ კი მოსყიდვის ბრალდებით ციხეში უშვებდნენ. არადა 50 ათასი დოლარის გამოძალვის ფაქტი გადაღებულია. მიუხედავავდ ამისა, გამომძალველის მაგივრად კავკასიის აკადემიური ცენტრის დამფუძნებელები დავით ცეცხლაძე და ნიკა ბაქარაშვილი 2011 წლის ივლისში დააკავეს და ერთწლიანი პატიმრობა მიუსაჯეს. მათ უცხოეთიდან ინგლისურის წიგნების შემოტანისთვის სპეციალური გრიფის მიღება სურდათ და მოლაპარაკებებს თანაშემწე აწარმოებდა, რომელიც ფელიქს უბირიას სახელით გაეცნო. კადრებში ჩანს ფელიქს უბირიას ნათქვამი, რომ ამ ყველაფერს მინისტრი შაშკინი და მისი მოადგილე კოკა სეფერთელაძე კურირებენ.
სიუჟეტის მიხედვით, ფელიქს უბირიამ ბიზნესმენებს კოკა სეფერთელაძე შეახვედრა, თუმცა კადრებში ის არ ჩანს და მხოლოდ მისი ხმა ისმის. ბიზნესმენებმა ეს მასალა ფარულად გადაიღეს, თუმცა, გამოძიების მიმდინარეობის დროს კუდ-ის გამომძიებლები ამ მასალებით არ დაინტერესდნენ.