ხვალ, 26 ოქტომბერს, 11:00 საათზე, სასტუმრო "შერატონ მეტეხი პალასში" პროექტის - "ელექტროენერგიის წამახალისებელი სატარიფო მეთოდოლოგია" - დაწყების ოფიციალური ცერემონიალი გაიმართება.
პროექტი მიზნად ისახავს ენერგეტიკის რეგულირების გაუმჯობესებას საქართველოში. იგი დაეხმარება საქართველოს ენერგეტიკისა და წყალმომარაგების მარეგულირებელ ეროვნულ კომისიას (სემეკი) წამახალისებელი სატარიფო მეთოდოლოგიის ეტაპობრივად დანერგვაში. პროექტი ასევე მოამზადებს ნიადაგს ევრო სტანდარტებთან შესაბამისობის მისაღწევად.
მომდევნო 21 თვის განმავლობაში ავსტრიელი, ბრიტანელი, გერმანელი და ლატვიელი ექსპერტები ქართველ კოლეგებთან ერთად იმუშავებენ ქუთაისში, სადაც სემეკი მდებარეობს.
პროექტი ერთობლივად ხორციელდება საქართველოს ენერგეტიკისა და წყალმომარაგების მარეგულირებელი ეროვნული კომისიისა (სემეკი) და ავსტრიის ენერგეტიკის მარეგულირებელი ორგანოს E-control-ის მიერ. პროექტი "თვინინგის" პროგრამის ნაწილია და მისი ბიუჯეტი 1,1 მლნ ევროა.
