საერთაშორისო საფინანსო კორპორაციის (IFC) და მსოფლიო ბანკის ახალი ანგარიშის თანახმად, ადგილობრივი კომპანიებისთვის ბიზნესგარემოს გაუმჯობესების თვალსაზრისით მსოფლიოში 2005 წლის შემდეგ აღმოსავლეთი ევროპა და ცენტრალური აზია ლიდერობენ. რეგიონმა გაუსწრო აღმოსავლეთ აზიას და წყნარი ოკეანის აუზის ქვეყნებს და ბიზნესისთვის ხელსაყრელი გარემოს თვალსაზრისით მეორე ადგილი დაიკავა ეკონომიკური თანამშრომლობის და განვითარების ორგანიზაციის (OECD) წევრი მაღალშემოსავლიანი ქვეყნების შემდეგ.
დღეს გამოქვეყნებული კვლევის `ბიზნესის წარმოება 2013: გამარტივებული წესები მცირე და საშუალო ზომის საწარმოებისთვის~ თანახმად, გასულ წელს პოლონეთმა მსოფლიოს მასშტაბით საუკეთესო შედეგი აჩვენა. მან ბიზნესის წარმოება ოთხი ინსტიტუციური და მარეგულირებელი რეფორმის მეშვეობით გაამარტივა, რითაც მნიშვნელოვნად გაადვილდა ქონების რეგისტრაცია, გადასახადების გადახდა, ხელშეკრულებების აღსრულება და გადახიდუუნარობასთან დაკავშირებული პრობლემების გადაწყვეტა. 2005 წლიდან მოყოლებული ევროპასა და ცენტრალურ აზიაში განხორციელდა დაახლოებით 400 ინსტიტუციური და მარეგულირებელი რეფორმა, რაც მნიშვნელოვნად აღემატება მსოფლიოს ნებისმიერ სხვა რეგიონში განხორციელებული რეფორმების რაოდენობას.
`ჩვენ ძალზე კმაყოფილები ვართ აღმოსავლეთ ევროპასა და ცენტრალურ აზიაში განხორციელებული რეფორმების სწრაფი ტემპით,~ განაცხადა მსოფლიო ბანკის ჯგუფის გლობალური მაჩვენებლების და ანალიზის განყოფილების დირექტორმა ავგუსტო ლოპეს-კლაროსმა. `ამ რეფორმების უმრავლესობა ევროკავშირის გაფართოებასთან დაკავშირებული მოლაპარაკებების კონტექსტში განხორციელდა. ეკონომიკური ინტეგრაცია და გაცილებით განვითარებულ პარტნიორებთან მიახლოების სურვილი მნიშვნელოვანი სტიმული იყო ამბიციური რეფორმების განხორციელების პროცესში.~
კვლევის მიხედვით, საქართველო ბიზნესის წარმოების სიმარტივის მიხედვით ქვეყნების პირველ ათეულში შევიდა. გარდა ამისა, 2005 წლიდან მოყოლებული, საქართველომ რეფორმების განხორციელების კუთხით მსოფლიო მასშტაბით საუკეთესო შედეგი აჩვენა. 2005 წლიდან საქართველოში 35 ინსტიტუციური და მარეგულირებელი რეფორმა განხორციელდა და ქვეყანამ წინ წაიწია ანგარიშში ასახულ ყველა ასპექტში. მხოლოდ გასულ წელს, საქართველომ რეფორმები კვლევის მიერ ასახულ ექვს სფეროში განახორციელა, რომელთა რაოდენობა აღემატება მსოფლიოს ნებისმიერი სხვა ქვეყნის მიერ განხორციელებული რეფორმების რაოდენობას.
საქართველომ, რომელიც მე-9 ადგილზეა ანგარიშში „ბიზნესის წარმოება 2013", გააადვილა კონტრაქტების შესრულება კომერციული დავების პროცედურების გამარტივებით და დაჩქარებით. მან გააძლიერა უზრუნველყოფილი გარიგებების სისტემა სამოქალაქო კოდექსში ცვლილებების შეტანით, რამაც შესაძლებელი გახადა გირაოს ჩანაცვლება და ასევე გირავნობის უფლების გავრცელება პროდუქტებზე და შემოსავლებზე. საქართველომ ელექტროენერგიის მიღება გააადვილა სადისტრიბუციო ქსელში ახალი მომხმარებლების ჩართვის პროცესის გამარტივებით და ჩართვის მოსაკრებლის შემცირებით. ქვეყანამ ასევე გააადვილა გადასახადების გადახდა კომპანიებისთვის ელექტრონული სისტემის გამოყენების გაფართოებით და გადასახადის გადამხდელებისთვის გაცილებით მეტი მომსახურებების შეთავაზებით. ამასთან ერთად, საქართველომ დააჩქარა გადახდისუუნარობასთან დაკავშირებული პრობლემების გადაწყვეტის პროცესი, მათ შორის აუქციონთან მიმართებაში მკაცრი ვადების დადგენით. დაბოლოს, მან შეამცირა იმპორტ-ექსპორტის პროცედურების განხორციელებისთვის საჭირო დრო ეკონომიკური გაფორმების ზონების შექმნით.
ზედიზედ უკვე მეშვიდე წელია, რაც სინგაპური ინარჩუნებს პირველ ადგილს გლობალურ რეიტინგში ბიზნესის წარმოების სიმარტივის თვალსაზრისით. მასთან ერთად პირველ ათეულში შემავალი ყველაზე ხელსაყრელი ბიზნესგარემოს მქონე ქვეყნებია: ჰონგ-კონგის სპეციალური ადმინისტრაციული რეგიონი (ჩინეთი), ახალი ზელანდია, ამერიკის შეერთებული შტატები, დანია, ნორვეგია, გაერთიანებული სამეფო, კორეის რესპუბლიკა, საქართველო და ავსტრალია.
წლევანდელი წლის კვლევაში მოცემულია ლატვიის მაგალითი, რომელშიც განხილულია ქვეყანაში მიმდინარე მარეგულირებელი რეფორმა და მიღწევები `ბიზნესის წარმოების ანგარიშის~ მიერ შეფასებულ სფეროებში.
