კოალიცია „ქართული ოცნება" საქართველოს სახალხო დამცველის თანამდებობაზე „საერთაშორისო გამჭვირვალობა - საქართველოს" პროგრამების ყოფილი დირექტორის ნინა ხატისკაცის კანდიდატურას განიხილავს.
როგორც კახეთის საინფორმაციო ცენტრისთვის გახდა ცნობილი, კოალიციაში გადაწყვეტილების მიმღებ პირთა შორის ხმათა უმრავლესობით ნინა ხატისკაცი ლიდერობს.
ხატისკაცის განცხადებით, მან შეთავაზება არაოფიციალური სახით მიიღო.
შეგახსენებთ, საქართველოს სახალხო დამცველის თანამდებობაზე სხვადასხვა არასამთავრობო ორგანიზაციებმა რამდენიმე კანდიდატურა დაასახელეს. ესენი არიან: „სამართლიანი არჩევნების" გამგეობის თავმჯდომარე, იურისტი თამარ გურჩიანი; „ადამიანის უფლებათა პრიორიტეტის" ხელმძღვანელი, ადვოკატი ლია მუხაშავრია და პარლამენტის ყოფილი წევრი დიმიტრი ლორთქიფანიძე.
პარლამენტმა ახალი სახალხო დამცველი შესაძლოა ხუთშაბათს დანიშნულ სხდომაზე აირჩიოს.
სახალხო დამცველის თანამდებობა ვაკანტური მას შემდეგ გახდა, რაც გიორგი ტუღუში სასჯელაღსრულების, პრობაციისა და იურიდიული დახმარების საკითხთა მინისტრის მოვალეობის შემსრულებლად დაინიშნა.
მასალის გამოყენების პირობები