"პიკ"-ის თანამშრომლები საზოგადოებრივი მაუწყებლის სამეურვეო საბჭოსგან არხის დირექტორის გია ჭანტურიას განცხადებაზე დაუყოვნებლივ რეაგირებას მოითხოვენ. განცხადებას 450-მდე ჟურნალისტი აწერს ხელს.
"ჩვენთვის, ჟურნალისტებისთვის, სრულიად შოკისმომგვრელი აღმოჩნდა ის ბრალდება, რომელიც გიორგი ჭანტურიას ჩვენს მიმართ გააჩნია. კერძოდ, იგი ითხოვს ტელეკომპანია "პიკ"-თან ურთიერთობის გადახედვას იმ მოტივით, რომ აღნიშნული ტელეკომპანიის თანამშრომლებმა გაბედეს და პროტესტი გამოხატეს პირდაპირ ეთერში, დასვეს სრულიად ლეგიტიმური კითხვები, მათ შორის, საბიუჯეტო თანხების ხარჯვასთან დაკავშირებით, რაც, მისი თქმით, "საზოგადოებრივი მაუწყებლის" მენეჯმენტს დარტყმის წინაშე აყენებს. ამით, ბატონი ჭანტურია პირდაპირ და დაუფარავად ცდილობს ადამიანის ფუნდამენტური უფლებების: სიტყვისა და გამოხატვის თავისუფლების ჩახშობას, ილაშქრებს ჟურნალისტის მთავარი ფუნქციის წინააღმდეგ - დასვას კითხვა და ახორციელებს დეკლარირებულ ცენზურას",- აღნიშნულია განცხადებაში.
"გვინდა ჩატარდეს აუდიტი, რომელიც დაადგენს, სად არის რეალურად თანხა, რომელიც სახელმწიფო ბიუჯეტიდან გადმოირიცხა, მაგრამ პირველ რიგში, ჩვენ მოვითხოვთ ჟურნალისტების უფლებების დაცვას. ჩვენ მოვითხოვთ, სიტყვის თავისუფლებას და მოვითხოვთ, ვიყოთ ეთერში და მაყურებელმა უყუროს ტელეკომპანია "პიკ"-ს", - განაცხადა არხის საინფორმაციო სამსახურის უფროსმა ეკატერინე კოტრიკაძემ.
შეგახსებთ, რომ "საზოგადოებრივმა მაუწყებელმა" ტელეკომპანია "პიკ"-თან საქმიანი კონტაქტები შეაჩერა .