დღეს, 20 ოქტომბერს, 12:00 საათზე, თიბისი ბანკი და "შატო მუხრანი" ღონისძიებას მართავენ.
ივანე მუხრანბატონის (ბაგრატიონთა) საგვარეულო მამულში, სტუმრებს პირველად მიეცემათ საშუალება, იხილონ მუხრანბატონების აღდგენილი სასახლე, დაათვალიერონ მუხრანბატონის ისტორიული მემკვიდრეობა, "შატო მუხრანის" ვენახები და მაღალტექნოლოგიური ქარხანა.
სტუმრებს ასევე შესაძლებლობა მიეცემათ, მონაწილეობა მიიღონ ტრადიციულ რთველში და ყურძნის ძველი წესით დაწურვაში, ასევე მოეწყობა შემოდგომის ფესტივალი ტრადიციული ქართული აქტივობებით: ჩურჩხელების ამოვლება, ჭაჭის გამოხდა, თონეში პურის ცხობა.
"ღონისძიების მეორე ნაწილში სტუმრებს ელით ბაგრატიონთა საუცხოო ტყე-პარკში მოწყობილი კონცერტი მრავალფეროვანი პროგრამით. თქვენ გაგიმასპინძლდებიან უგემრიელესი ქართული კერძებით და "შატო მუხრანის" პრემიუმ კლასის ღვინოებით", - აღნიშნავენ ღონისძიების ორგანიზატორები.
ღონისძიებაზე მიწვეულნი არიან დიპლომატიური კორპუსის, საერთაშორისო და ქართული ბიზნეს ორგანიზაციების წარმომადგენლები და საზოგადოების ცნობილი სახეები.