21 ოქტომბერს, 13:00 საათიდან, მთაწმინდის პარკში პროექტი "ჩემი ფუნიკულიორი" დაიწყება. პროექტის ინიციატორები არიან "მთაწმინდის პარკის" ადმინისტრაცია და "თიბისი არტ გალერეა", პროექტის მხარდამჭერი - ფოტოკონკურსი "ქოლგა".
პროექტის მიზანია "თბილისი" პარკის პოპულარიზაცია და ხელოვნების სფეროს წარმომადგენელთათვის ახალი არტსივრცის შექმნა. ღონისძიების ორგანიზატორთა განცხადებით, ეს არის მცდელობა, დაფუძნდეს ერთგვარი თბილისური მონმარტრი, სადაც ქართველ არტისტებს საშუალება ექნებათ იმუშაონ და იურთიერთონ დამსვენებლებთან.
"გასული საუკუნიდან მოყოლებული, ეგრეთწოდებული "ფუნიკულიორის ბაღი" თბილისელთა და დედაქალაქის სტუმართა უსაყვარლესი დასასვენებელი ადგილი იყო. ბოლო პერიოდში განვითარებულმა მოვლენებმა იგი ერთგვარად ამოაგდო ქალაქური ცხოვრების უმნიშვნელოვანეს ობიექტთა რიგიდან. თუმცა პარკის მესვეურებმა საკმაო შრომა და ხარჯი გაწიეს პარკის რეაბილიტაციისათვის, დღეს მოქალაქეთათვის "თბილისი" პარკი უმთავრესად ბავშვთა დასასვენებელ ადგილად მოიხსენიება.
ჩვენი პროექტის მთავარი იდეაა, კულტურისა და ხელოვნების მოღვაწეთა აქტიური ჩართვა პარკის რეაბილიტაციის საქმეში და მისთვის კულტურული ფუნქციის დაბრუნება. პროექტი არ შემოიფარგლება ერთჯერადი აქციით და გათვლილია კულტურის ღონისძიებათა მთელ რიგზე, რომელიც გულისხმობს ვიზუალური ხელოვნების, მუსიკის, დრამატული ხელოვნების წარმომადგენელთა მოწვევით "თბილისი" პარკში მნიშვნელოვანი კულტურული ტრადიციების აღორძინებას", - აცხადებენ ისინი.