კომპანია „მედისონმა" ექსპერტთა საბჭო და პროფესიული განვითარების ცენტრი შექმნა. როგორც კომპანიაში განმარტავენ, საბჭოსა და ცენტრის შექმნა კლინიკების მიერ მიწოდებული სამედიცინო მომსახურების ხარისხის გაუმჯობესებასა და ექიმების კვალიფიკაციის ამაღლებას ემსახურება.
„დაგეგმილი ტესტირებები არ ისახავს მიზნად სამედიცინო პერსონალის შემცირებას, მისი მიზანია გამოვავლინოთ ტრენინგების საჭიროების სფეროები/ნოზოლოგიები და მივაწოდოთ ექიმებს უახლესი მიდგომები, გაიდლაინები და პროტოკოლები.
პირველ რიგში ვიწყებთ ოჯახის ექიმების ტრენინგებს, რადგან ოჯახის ექიმი პატრონაჟს ყველა ასაკობრივი კატეგორიის პაციენტს უწევს და პაციენტის მკურნალობის ტაქტიკის ძირითადი განმსაზღვრელია. სწორედ ოჯახის ექიმის კვალიფიკაცია განსაზღვრავს სწორად წარიმართება თუ არა პაციენტის დიაგნოსტიკა, დაავადებათა პრევენცია და მკურნალობა. მეორე ეტაპზე არის დაგეგმილი სხვადასხვა პროფილის სპეციალისტების ტრენინგების ჩატარება," - განმარტავენ „მედისონში".
პროექტის ფარგლებში შეიქმნა ტრენინგების მოდულები ექიმებისთვის. მოდულები ითვალისიწნებს ტრენინგების ჩატარებას, რომელიც გულისხმობს პრეტესტის გამართვას ტრენინგების დაგეგმვის მიზნით, შემდეგ ტრენინგს და პოსტ-ტესტს.
შეგახსენებთ, რომ „მედისონი" სამ კლინიკას #1 პროფილაქტიკურ-დიაგნოსტიკურ ცენტრს, #2 პროფილაქტიკურ-დიაგნოსტიკურ ცენტრსა და სამედიცინო ცენტრს "ჯანმრთელობა" ფლობს. „მედისონში" შექმნილი ექსპერტთა საბჭო და პროფესიული განვითარების ცენტრი დაკომპლექტებულია დიდი გამოცდილების და მაღალი კვალიფიკაციის მქონე პროფესიონალებით.
