მანდატურის ფორმატი უნდა გავიაზროთ უკეთესად ან პრობლემის გადაწყვეტის ალტერნატიული გზა უნდა წარმოვადგინოთ, - ასე ეხმიანება საოციალურ ქსელ ფეისბუქში 24-ე სკოლის დირექტორი გია მურღულია მანდატურების ინსტიტუსი შესახებ გამოთქმულ ინიციატივას.
მურღულია მიიჩნევს, რომ თუ ინსტიტუცია უპირობოდ გაუქმდა, ასეთი გადაწყვეტილების მიმღები თავის თავზე აიღებს სრულ პასუხისმგებლობას სკოლებში ძალადობის ისევ აღზევებაზე.
"რა უნდა ვთქვათ მანდატურებთან დაკავშირებით? საქმის არსი ასეთია: "ერთ მშვენიერ დღეს" აღმოჩნდა, რომ სკოლას ძალადობისა და დისციპლინის უხეში დარღვევის სერიოზული პრობლემა აქვს - ძალიან მომრავლებული იყო დაჩაგვრის, წართმევის, საქმის "ქურდული"გარჩევის, ფიზიკური და მორალური შეურაცხყოფის, ცივი იარაღის ტარების მაგალითები. ეს სკოლისა და ოჯახის, მთლიანად საზოგადოების დიდ შეშფოთებას იწვევდა და მხოლოდ აღმზრდელობითი აქტივობებით ვერ რეგულირდებოდა. ამას ზედ დაერთო რამდენიმე მკვლელობაც, რომლებშიც მოზარდები მონაწილეობდნენ. ეს ბოლო წვეთი იყო. განათლების სამინისტროს წინა ხელმძღვანელობამ ამ პრობლემის გადაწყვეტის "მანდატურული" გზა შემოგვთავაზა. უნდა ვაღიაროთ, რომ პრობლემა არსებითად გადაიჭრა. ახლა ასეთი დილემის წინაშე ვდგავართ: თუ მანდატურებს, ნებსით ან უნებლიეთ, არასწორი ფუნქციები გადაეცათ (ან სკოლის ადმინისტრაციების - ზოგიერთების! - შინაგანი არათავისუფლებისა თუ დოყლაპიობის გამო თავად მიითვისეს), ეს უნდა გამოსწორდეს და პოლიტიკური კონტროლიორის ნაცვლად კრიმინალის პრევენციისა და სასწავლო-აღმზრდელობითი პროცესის დამხმარის ფუნქციის მატარებელი ადამიანი მივიღოთ ან ეს ინსტიტუცია საერთოდ უნდა გაუქმდეს (როგორც ზოგიერთები ითხოვენ). ერთი დანამდვილებით უნდა ითქვას: თუ ინსტიტუცია უპირობოდ გაუქმდა, ასეთი გადაწყვეტილების მიმღები თავის თავზე აიღებს სრულ პასუხისმგებლობას ჩვენს სკოლებში ძალადობის ისევ აღზევებაზე. ან მანდატურის ფორმატი უნდა გავიაზროთ უკეთესად ან პრობლემის გადაწყვეტის ალტერნატიული გზა უნდა წარმოვადგინოთ. სხვა ყველაფერი დილეტანტიზმი იქნება, რაც, კაცმა რომ თქვას, არ ივარგებს", - წერს მურღულია განცხადებაში.
