შოთა რუსთაველის სახელობის თეატრისა და კინოს სახელმწიფო უნივერსიტეტის რექტორი ნოშრევან ჩხაიძე თანამდებობდან გადადგა. აღნიშნულის შესახებ მან ჟურნალისტებთან თავად განაცხადა.
აკადემიური საბჭოს წარმომადგენელმა ბუბა ხოტივარმა აღნიშნა, რომ ჩხაიძემ გადაწყვეტილება მასთან შეთანხმების საფუძველზე მიიღო და რაიმე ზეწოლას ადგილი არ ჰქონია.
როგორც ჩხაიძე აცხადებს, ბოლო დღეებში განვითარებული მოვლენების შემდეგ ის დარწმუნდა, რომ მისთვის ამ ფორმატში თეატრალურ უნივერსიტეტში რექტორად მუშაობა შეუძლებელი იქნებოდა.
რექტორის მოვალეობის შემსრულებლად ამ დროისთვის ყოფილი რექტორის, გოგი მარგველაშვილის კანდიდატურა განიხილება. აკადემიური საბჭოს სხდომა 15:00 საათიდან მიმდინარეობდა.
ჩხაიძის გადადგომა ლექტორებმა და სტუდენტებმა მოითხოვეს. უნივერსიტეტის წარმომადგენლობითი და აკადემიური საბჭოები ითხოვდნენ, ბათილად ყოფილიყო ცნობილი უნივერსიტეტის რექტორის 2012 წლის 23 აგვისტოს არჩევნები, რომლის შედეგადაც რექტორის პოსტი ჩხაიძემ დაიკავა. მათი განცხადებით, არჩევნები ჩატარდა წარმომადგენლობითი საბჭოსთვის სრულიად დამოუკიდებლად შექმნილი წესებით და თავად წესდება შემუშავებული იყო უკანონოდ, რადგან მასში მონაწილეობა არ მიუღია არც წარმომადგენლობით და არც აკადემიურ საბჭოს.
