„ქრისტიან-დემოკრატიული მოძრაობის" ქედის მაჟორიტარი დეპუტატობის კანდიდატები საქართველოს პარლამენტსა და აჭარის უმაღლეს საბჭოში ბათუმის ცენტრალურ ბაზარში მოვაჭრეებს შეხვდნენ და მათ პრობლემებს ადგილზე გაეცნენ. ელგუჯა ნაკაშიძემ და ნადეჟდა ჯაბნიძემ მოვაჭრეებს საარჩევნო პროგრამის ის ნაწილი და პრიორიტეტები გააცნეს, რასაც „ქრისტიან-დემოკრატები" სოფლის მეურნეობის განვითარების კუთხით გეგმავენ. ელგუჯა ნაკაშიძის განცხადებით სოფლიდან ჩამოსულ გლეხს, საკუთარი ხელით მოწეული პროდუქციის ნორმალური რეალიზაციის საშუალება არა აქვს. მისივე ინფორმაციით იმის გამო, რომ ბაზარში ყველა დახლი დაკავებულია ე.წ გადამყიდველების მიერ, გლეხი იძულებულია ბაზრის მიმდებარე ტერიტორიაზე გამოვიდეს. თუმცა, როგორც ნაკაშიძემ აღნიშნა, კანონით გარევაჭრობა მხოლოდ დილის 11 საათამდეა ნებადართული, ამიტომ გლეხი იძულებულია რაც შეიძლება მალე, ნებისმიერ ფასში გაყიდოს თავისი პროდუქცია, აღებული თანხა კი ხშირად მის თვითღირებულებაზე ნაკლები გამოსდის.
„ჩვენი, „ქრისტიან-დემოკრატების" მთავარი მიზანია, ჩვენი არჩევის შემთხვევაში გადავუჭრათ გლეხებს სოფლის მეურნეობის პროდუქციის რეალიზაციასთან დაკავშირებული პრობლემები. გავხსნათ გადამამუშავებელი საწარმოები და ჩამბარებელი პუნქტები, რაც სოფლის მეურნეობის რეალური განვითარების ერთადერთი გზაა." - განაცხადა ელგუჯა ნაკაშიძემ.