სტიქიის შედეგად დაზარალებულ მოსახლეობას ხელისუფლება კომპენსაციებს შერჩევითი პრინციპის საფუძველზე ურიგებს, - ამის შესახებ "ქართული ოცნების" ოფისში გამართულ ბრიფინგზე თინათინ ხიდაშელმა განაცხადა. მისივე თქმით, ხელისუფლებამ პრობლემის ადეკვატურად მოგვარება დღემდე ვერ მოახერხა.
"ამ შემთხვევაში, მოსახლეობა სამ ძირითად პრობლემას აწყდება. პირველი ის არის, რომ კომპენსაციების დარიგება ხდება პოლიტიკური ნიშნით, 1500 ლარს აძლევენ იმათ, ვინც ხელისუფლების მიმართ ლოიალურია, მეორე პრობლემა ისაა, რომ მიყენებული ზარალის არაპროპორციული და არაადეკვატური დათვლა მოხდა და მესამე პრობლემა ისაა, რომ 4 სოფლის მოსახლეობა უარით გამოისტუმრეს, რადგან უთხრეს, რომ მათი ვენახი და ნათესები არა ახლა, არამედ წინა სტიქიის დროს განადგურდათ", - განაცხადა ხიდაშელმა.
საგარეჯოს მაჟორიტარი დეპუტაობის კანდიდატმა თინათინ ხიდაშელმა უშუალოდ საგარეჯოს რაიონის მოსახლეობასაც მიმართა და პირობა მისცა, რომ თუ ხელისუფლება მათი პრობლემების მინიმალურ დონეზე მოგვარებას მაინც ვერ შეძლებს, 1-ელი ოქტომბრის შემდეგ ყველა ოჯახი ზარალის შესაბამის კომპენსაციას მიიღებს.
