აღმოჩენა თბილისში - პუშკინის ქუჩაზე მიმდინარე სამუშაოების დროს დედაქალაქის ძველი გალავნის ნანგრევები იპოვეს. სპეციალისტების ინფორმაციით, გალავნის ფრაგმენტები მე-12-დან მე-18 საუკუნეების ჩათვლით თარიღდება.
არქეოლოგებმა ასევე მიაგნეს თიხის ჭურჭელს და ბირთვის ქვას, რომელსაც ომის დროს იყენებდნენ.
არქეოლოგების თქმით, გალავნის არსებობის შესახებ აქამდეც იცოდნენ. მასზე საუბარია თბილისის შესახებ არსებულ ისტორიულ წყაროებში.
სპეციალისტების განცხადებით, გალავნის სრული მონახაზი კარგად ჩანს ასევე ვახუშტი ბატონიშვილის მიერ 1735 წელს შექმნილ პირველ ატლასშიც.
როგორც თბილისის განვითარების ფონდში აცხადებენ, იგეგმება ამ ტერიტორიის კონსერვაცია. გალავნის ფრაგმენტების ნახვა ტურისტებს და ნებისმიერ მსურველს შეეძლება. მიმდინარე სამუშაოების გამო პუშკინის ქუჩის მიმდებარე ტერიტორიაზე მოძრაობა ორი კვირის განმავლობაში შეზღუდული იქნება.
